La sanaziun da l’anteriur deposit da muniziun da l’armada a Mitholz en il chantun Berna custa var 1,5 milliardas francs. Quai mussan las novissimas calculaziuns che la Confederaziun ha preschentà glindesdi saira a la populaziun pertutgada da la rumida.
Vitiers vegnian dentant anc la chareschia ed ina reserva per ristgas nuncalculablas. Sco quai ch’il Departament federal da defensiun, protecziun da la populaziun e sport scriva vegnia il Cussegl federal perquai a proponer al parlament, probabel anc avant la fin da l’onn, in credit d’obligaziun en l’autezza da 2,5 milliardas francs. Oriundamain quintavan ils responsabels cun custs d'enfin 900 milliuns francs.
Probabel 3'500 tonnas muniziun
Anc adina na saja betg dal tut cler quanta muniziun che saja sepulida en il culm. Ultra da quai saja impurtant da proteger l’ambient durant las lavurs da rumida. Analisas hajan mussà ch’il terren saja contaminà cun metal grev ed autras chemicalias nuschaivlas. Il plazzal stoppia perquai vegnir protegì da l’aura ed ins stoppia analisar e schubregiar il material avant che deponer quel, scriva il VBS.
Tenor il plan dal VBS duain las lavurs da rumida cumenzar il 2030 e cuzzar circa diesch onns. Durant quest temp sto ina part da la populaziun da Mitholz bandunar lur dachasa, quai per raschuns da segirtad.
