Ina part dal moviment da chauma per il clima lantscha il referendum cunter la lescha da CO2. Quai han represchentants dal moviment communitgà a Berna, in’emna suenter la votaziun finala en il parlament.
La lescha da CO2 ch’è vegnida revedida cumplettamain na bastia insumma betg per franar il stgaudament dal clima, scrivan ils iniziants dal referendum. La lescha da CO2 cumpiglia differentas mesiras da la politica da clima che vulan reducir l’emissiun da CO2 fin il 2030.
Per ch’il referendum gartegia ston ils organisaturs rimnar 50’000 suttascripziuns valablas entaifer 100 dis.
Partidas crititgescha moviment da chauma per il clima
Pervi da ses agir cunter la lescha da CO2 vegn il moviment da chauma per il clima sut squitsch. La gronda part da las fracziuns en Chasa federala reagescha cun nunchapientscha sin il referendum. Las partidas PS, PLD, PCD, ils Verds ed ils Verdliberals crititgeschan, ch'in referendum cunter la lescha da CO2 pericliteschia l'entira politica dal clima da la Svizra.
