Siglir tar il cuntegn

Header

cuntegn

Mutaziun dal coronavirus Cumprovà en 5 ulteriurs pajais sper la Gronda Britannia

Entant è la nova varianta dal virus vegnida cumprovada en tschintg ulteriurs pajas sper la Gronda Britannia. Quai èn tenor l'Organisaziun mundiala per la sanadad WHO: L'Italia, l'Australia, l'Islanda, ils Pajais Bass ed il Danemarc.

  • Tuttas persunas ch'èn entradas dapi il 14 da december en Svizra ston ir per 10 dis en quarantina.
  • Il Cussegl federal ha er decretà in scumond d'entrada per tuttas persunas estras che vulan vegnir en Svizra nà da la Gronda Britannia u da l'Africa dal Sid.

Vitiers ha il Cussegl federal er francà il scumond da sgol tranter la Gronda Britannia e l'Africa dal Sid en la terza ordinaziun da Covid-19. Da mesanotg da dumengia il 20 da december ha l'Uffizi federal d'aviatica civila bloccà tuttas colliaziuns da sgol tranter la Svizra e quests dus pajais.

La taskforce da la Confederaziun ha dentant er communitgà il suandant:

  • En Svizra n'han ins anc betg constatà la nova varianta dal virus. La task force da la Confederaziun è dentant da l'avis ch'el pudess gia esser qua.
  • La nova varianta dal coronavirus duai esser 70% pli contagiusa. I na dat dentant naginas indicaziuns ch'il vaccin na mussia betg effect ed er betg che la malsogna saja pli gravanta.

En Svizra n’han ins enfin ussa betg constatà la mutaziun dal virus. Ma la task force scientifica da la Confederaziun è da l’avis che la varianta è forsa gia qua en pitschnas quantitads. Quai ha la task force ditg envers l’agentura da novitads Keystone SDA.

Nov lockdown enturn Londra

Anc avant curt n'ha il primminister Boris Johnson betg vulì tadlar sin las opiniuns d'experts che cussegliavan da far in nov lockdown e rinforzar las mesiras encunter il coronavirus sur il temp da Nadal. Uss ston tuttina milliuns da persunas festivar sulet.

Nus unfrin la pussaivladad da vesair quest onn noss chars da Nadal, per che nus hajan ina meglra schanza da proteger lur vitas per che nus sappian festivar en avegnir cun els.
Autur: Boris Johnsonprimminister britannic

En la regiun da Londra han ins numnadamain chattà la nova varianta dal virus. Per la regiun pertutgada ha la regenza britannica relaschà in nov lockdown.

L'organisaziun per sanadad mundiala WHO saja en stretg contact cun la Gronda Britannia. Las autoritads britannicas partian tuttas infurmaziuns davart lur analisas e studis. Ins vegnia ad infurmar uschè prest ch'ins sappia dapli davart caracteristica ed effects da la nova varianta dal virus.

Scumonds da sgular

Plirs pajais han gia stritgà tut ils sgols a Londra ed en Gronda Britannia pervi da la nova varianta dal virus. Uschia la Germania ed il Pajais Bass. L'Italia e l'Austria han annunzià mesiras. Dapi mesanotg na pon er nagins sgols da la Gronda Britannia pli sa tschentar en Svizra. Er da l'Africa dal Sid n'arrivan nagins aviuns da passagiers pli, er là datti rapports da la nova varianta.

Il pass saja vegnì fatg suenter ch’els sajan stads ier saira en contact cun l’Uffizi federal da sanadad BAG ed auters uffizis e departaments da la Confederaziun, ha ditg il servetsch da medias da l’Uffizi federal d’aviatica civila. I saja ina mesira immediata per impedir in’eventuala derasaziun dal virus. Quant ditg che la mesira vala, n'è anc betg enconuschent.

audio
Per tadlar curt e cumpact
01:06 min, RTR Audio dals 20.12.2020.
laschar ir. Durada: 01:06 minutas.

RTR novitads 12:00 +

Artitgels legids il pli savens

Scrollar a sanestra Scrollar a dretga