Siglir tar il cuntegn

Header

video
Swissmedic dat permissiun per covid-vaccin
Or da Tagesschau dals 19.12.2020.
laschar ir
cuntegn

Biontech & Pfizer Swissmedic lubescha emprim vaccin da corona

Ils chantuns pon cumenzar anc quest mais a vaccinar persunas ch’èn fitg periclitadas. A partir da l’entschatta da schaner pon lura las gruppas da ristg sa laschar vaccinar en l’entira Svizra, uschia l’Uffizi federal da sanadad BAG.

L'autoritad svizra per medicaments Swissmedic, ha dà la lubientscha per l'emprim vaccin encunter Covid-19. I sa tracta dal vaccin da la firma americana Pfizer e la firma tudestga Biontech. La protecziun giaschia suenter tar passa 90%. Sco l’Uffizi federal da sanadad BAG ha infurmà èn las emprimas 100'000 dosas dal vaccin gia prontas a partir da la proxima emna.

Lubientscha en process normal

Questa lubientscha è mundialmain l'emprima che vegnida dada en in process normal per medicaments. Ils ulteriurs pajais che han gia lubì da dar il vaccin, han fatg quai cun lubientschas d'urgenza. Swissmedic haja dà la lubientscha suenter avair evaluà il niz ed il ristg durant l'expertisa rullanta. Il niz predomineschia qua ils ristgs. Il vaccin saja segir. Ils effects secundars che cumparian il pli savens cun vaccinar, sajan sumegliants a quels d'in vaccin encunter la grippa.

Las datas che sajan avant maun, mussian tar tuttas gruppas da vegliadetgna in'effectivitad sumeglianta ed il vaccin adempleschia ils criteris da segirezza. En vista a las consequenzas da la pandemia, saja la lubientscha in crap da miglia per la sanadad publica, uschia sa lascha il directur da Swissmedic, Raimund Bruhin citar en ina communicaziun.

Duas dosas en 21 dis

A partir da 16 onns possian ins vaccinar encunter il coronavirus, sche las recumandaziuns uffizialas dal BAG vegnian resguardadas. Per ch'il vaccin funcziunia optimal, vegnan dadas duas dosas cun distanza da 21 dis. Set dis suenter la segunda dosa giaschia la protecziun tenor datas dal studi da Swissmedic tar passa 90%.

Vegnia surveglià rigurus

Swissmedic vegnia a survegliar a moda rigurusa il vaccin, sco quai ch'ella fetschia er cun auters medicaments sin il martgà. Sch'i saja necessari vegnia intervegnì.

L'autoritad maina per persunal dal fatg medicinal in sistem online spezial. Là possian ils medis inditgar sch'i dettia effects secundars betg giavischads. Sch'ina persuna vaccinada survegnia pli ferms sintoms u sintoms betg spetgads, possian ins s'annunziar tar ils centers da vaccinar, en in ospital, tar il medi u en in'apoteca.

Sco Swissmedic ha declerà, vegnian er las ulteriuras dumondas per lubientschas da vaccins tractads cun tuttas resursas pussaivlas e cun auta prioritad. Davart ulteriuras lubientschas vegnia infurmà cura ch'i dettia novas datas.

Reacziun dad Alain Berset sin vaccin

Il minister da sanadad Alain Berset ha prendì posiziun davart la lubientscha dal vaccin en in video sin twitter e ha discurrì dad ina buna novitad:

Tenor Alain Berset vegnan vaccinadas l’emprim persunas ch’èn spezialmain periclitadas. In obligatori da vaccinar na dettia però betg. La vaccinaziun è gratuita.

Surprais da la spertadad

Ils chantuns èn surprais da la spertadad ch'in emprim vaccin a gia survegnì la lubientscha. Quai ha ditg Michael Jordi da la Conferenza dals directurs chantunals da sanadad, GDK. El ha avertì che l'acziun da vaccinar na vegnia betg a funcziunar da bell'entschatta senza problems.

RTR novitads 11:00

Artitgels legids il pli savens

Scrollar a sanestra Scrollar a dretga