Sco emprim pajais ha la Gronda Britannia approvà la lubientscha d'urgenza per il vaccin da corona da l'interpresa tudestga Biontech e ses partenari american Pfizer. L'autoritad per medicaments ha dà la lubientscha, ha communitgà la regenza a Londra.
A partir da proxima emna pon ins survegnir il vaccin en l'entira Gronda Britannia.
Quai saja ina fitg buna novitad, ha ditg il minister da sanadad Matt Hancook. Mardi han Biontech e Pfizer dumandà per la lubientscha tar l'agentura da medicaments europeica. Sche la EMA dat glisch verda, pudess quai lubir da cumenzar a vaccinar la glieud anc avant la fin da quest onn.
Nagina lubientscha en Svizra
En Svizra na possian ins anc betg lubir in vaccin cunter corona. Quai ha ditg Claus Bolte, il manader da la sparta admissiun da Swissmedic al Point de presse avant las medias da la Chasa federala. I saja impurtant da dar la lubientscha tant pli svelt, ma betg sin donn e cust da la precauziun.
