Virginie Masserey ha avertì ch'i restia en il fratemp impurtant da sa laschar testar. Era cura che las cifras sa reduceschian haja num da far tests, ha la manadra da la controlla d'infecziuns dal BAG ditg.
Ella ha era ditg che tests svelts sajan tar gnieus da l'infecziun ina nova pussaivladad per chattar ora – tgi che saja infectà e tgi betg. Era en chasas d'attempads sajan quests tests svelts bain adattads.
Plinavant ha Masserey infurmà, che la situaziun sin las staziuns intensivas saja sa schluccada in zic. Intgins chantuns sajan dentant vinavant sut squitsch.
Differenzas regiunalas
Il manader da la taskforce Covid-19 Martin Ackermann ha ditg, ch'els quintian d'avair mintga duas emnas mo pli la mesadad dals cas. Quai mussia il svilup da las duas davosas emnas.
Il pli ferm sajan las cifras idas enavos en la Svizra romanda, ils chantuns là hajan dentant era prendì dapli mesiras. En intgins dals auters chantuns saja dentant perfin da vesair in svilup cuntrari.
Contact tracing funcziuna
Uscheditg che las cifras restian sin l'aut nivel actual na saja betg da temair per il contact tracing, ha manegià Rudolf Hauri, il president dals medis e da las medias chantunalas. Sch'ils cas da corona s'augmentian dentant puspè, vegnissan il contact tracing ed il sistem da sanadad puspè als cunfins. Era en vista a las temperaturas bassas e dapli glieud cun grippa, na sajan las cifras da corona stabilas nagina raschun per daventar luc.
Accidents da skis
Sin la dumonda d'in schurnalist, sch'ils ospitals sajan era pronts sch'ils accidents da skis s'augmentian, ha Hauri manegià ch'els sajan en principi preparads, cunzunt en las regiuns da skis. Cun esser attent uss e gidar ch'ils cas sa reduceschian vinavant, lura possian era quintar da pudair ir cun skis l'enviern, ha ditg il president dals medis chantunals.
Las cifras dals 24 da november
Il mardi ha l'Uffizi federal da sanadad BAG annunzià 4'241 novs cas dal coronavirus. La media da set dis è uschia tar 4'289, quai èn 24 pertschient damain che l'emna passada. Il trend mussa il mument engiu.
