En tut ils trais scrutinis èn tant Beat Jans sco era Daniel Jositsch stads a la testa da Jon Pult. En il terz scrutini èsi lura stà cler che Beat Jans è il nov cusseglier federal. Jon Pult ha plaschair per ses concurrent Jans ed è persvadì che lez vegnia ad esser in bun cusseglier federal.
Dà tut – ma tuttina betg tanschì
Cler, ch'el saja dischillus suenter quest cumbat e suenter ch'el haja dà tut. Sch'ins cumbattia veglian ins la finala era gudagnar. Tge ch'ils motivs per la terrada èn, na possia el betg dir curt suenter. Sco ch'i para haja ses concurrent Beat Jans persvadì meglier e gì ils megliers arguments.
Datti insacura ina nova schanza sco cusseglier federal?
Questa dumonda respunda Jon Pult a moda diplomatica. Sia schanza saja stada uss e quella haja el manchentà. Ma ins duess mai dir mai. Pult di ch'el haja bleras autras perspectivas professiunalas e persunalas e sin quellas ed en spezial sin ses mandat sco cusseglier naziunal veglia el uss sa concentrar.
Uschia spetga la Rumantschia vinavant sin ses segund cusseglier federal. L'ultima e suletta giada ch'in Rumantsch ha fatg il pass en la regenza svizra è stà Felix Calonder avant passa 100 onns, l'onn 1913.
