Ina clera maioritad dals votants e da las votantas en Svizra na vulan betg introducir in servetsch civic per tut ils umens e las dunnas. Cunter l'iniziativa per in servetsch per mintgin e mintgina hai dà in Na massiv, cun 84,1% da las vuschs. En nagin chantun, e perfin en nagina da las 2'100 vischnancas en il pajais ha l'iniziativa chattà sustegn. La participaziun è stada tar radund 43%.
Refusada il pli ferm è l'iniziativa vegnida en il chantun Appenzell-Dadens, 88,3% dals votants e da las votantas han ditg Na. Da l'autra vart èn quels dal chantun Basilea-Citad anc stads ils pli bainvulents cun l'iniziativa – radund 20% han ditg Gea.
Iniziativa service-citoyen
Svizra: Iniziativa per ina Svizra che s'engascha (Iniziativa servetsch civic)
-
GEA
379'595 Vuschs
-
NA
2'014'638 Vuschs
Vuschs dals chantuns
- GEA
- Na
Decisiun n'excluda betg in engaschi voluntar
Il ferm Na a l'iniziativa service-citoyen na saja nagina refusaziun a servetschs da milissa, ha ditg il minister da defensiun Martin Pfister suenter ch'ils resultats èn stads sin maisa. Dentant las votantas ed ils votants veglian che quest engaschament restia voluntar.
Las iniziantas ed ils iniziants èn trumpdads dal resultat cler per lur idea. Dentant els hajan procurà ch'ina tematica vegnia sin maisa che saja vegnida ignorada fin uss dal tut, ha ditg la presidenta dal comité d'iniziativa Noémie Roten envers l'agentura da novitads Keystone-SDA. I giaja per la segirezza, la coesiun en Svizra e l'egualitad. Uss haja num manar vinavant la discussiun.
Tut las vischnancas grischunas han ditg Na
La populaziun grischuna trametta da l'aua giu l'iniziativa per in servetsch civic. 83.5% dals votants e votantas din Na a la pretensiun che mintga burgais e mintga burgaisa da la Svizra presta in servetsch a favur da la publicitad u da l'ambient. Tut las vischnancas grischunas din Na. Ils pli clers resultats vegnan da Runcaglia e Farera – là na di insumma nagina persuna Gea a la proposta. Ma era tut las autras vischnancas èn stadas cleramain cunter il servetsch per mintgin. A Poschiavo han «mo» 75.7% da la populaziun ditg Na.
Grischun di cleramain Na a l'iniziativa servetsch civic
Resultat 13:00
Tge che l'iniziativa vuleva
Tenor l’iniziativa avess mintga burgais e burgaisa da la Svizra gì da prestar in servetsch a favur da la publicitad u da l’ambient. Cun il servetsch «service-citoyen» vuleva l’iniziativa rinforzar il bainstar public. Tranter auter en il sectur da la protecziun dal clima, la prevenziun da catastrofas, la segirezza alimentara e la tgira.
