Tenor l’iniziativa duess mintga burgais e burgaisa da la Svizra prestar in servetsch a favur da la publicitad u da l’ambient. Cun il servetsch «service-citoyen» vul l’iniziativa rinforzar il bainstar public. Tranter auter en il sectur da la protecziun dal clima, la prevenziun da catastrofas, la segirezza alimentara e la tgira. Per in’approvaziun è necessaria la maioritad dal pievel ed era la maioritad dals chantuns.
Quai è nov
Nov avessan era dunnas da far in servetsch. Quel pudess vegnir fatg en il militar, en la protecziun civila u en furma d’in servetsch equivalent. Il dumber reglamentar da persunas en l’armada u servetsch civil sto esser garantì. Persunas che na fan nagin servetsch duessan era en il futur pajar ina taxa. Atras l’introducziun da la nova obligaziun da servetsch vegnissan recrutadas dubel uschè bleras persunas. Da actualmain 35’000 persunas sin nov 70’000 persunas per onn. Uschia s’augmentassan ils custs per la Confederaziun, ils chantuns e l’economia. En emprima lingia pertutga quai persunas cun pass svizzer. Sin plaun legislativ, pia en la lescha pudess suenter vegnir decis, sche era persunas senza pass svizzer ston prestar in servetsch.
Il Cussegl federal ed era il parlament recumondan da refusar quest’iniziativa. Tenor els va l’iniziativa lunsch sur ils basegns da l'armada e la protecziun civila ora. E chaschuna uschia custs auts per la Confederaziun, ils chantuns e l’economia.