Il president da la Confederaziun, Guy Parmelin n'è betg dal medem avis sco sia partida. El e la ministra da giustia Karin Keller-Sutter han renvià la renfatscha da la PPS che la Svizra saja daventada en la pandemia da corona ina dictatura sut la direcziun dal minister da sanadad Alain Berset.
En Svizra haja il pievel il davos pled, ha Parmelin ditg en gasettas da CH-Media. La fermezza da la Svizra sajan sias instituziuns, ha Keller-Sutter ditg en la medema intervista dubla.
Er la co-presidenta da la PS, Mattea Meyer ha ditg en ina intervista cun las gasettas da Tamedia che cun la pretensiun che la Svizra saja daventada ina dictatura haja la PPS surpassà in cunfin. Cunter ina dretga dictatura fiss opposiziun violenta lubida ed er necessaria. Cun sia renfatscha dettia la PPS ina stgisa als adversaris da las mesiras da corona da far diever da violenza. Quai saja in privel massiv per la democrazia, uschia Meyer vinavant.
