Siglir tar il cuntegn

Header

Navigaziun

Purtret dad Ueli Maurer
Legenda: En in'intervista cun las gasettas da CH-Medien ha il president da la Confederaziun Ueli Maurer crititgà che las medias tematiseschian betg pli avunda profund las tematicas. Keystone
cuntegn

Svizra «Nagina profunditad pli»

En in'intervista ch'è vegnida publitgada oz tar las gasettas da CH-Media, crititgescha Ueli Maurer fermamain las medias. Ad el manchian las discussiuns fundamentalas en las gasettas, ha ditg Maurer. Quai stoppia dar da pensar.

Tut vegn adina a pli e pli curta vista, i na dat nagina profunditad pli.
Autur: Ueli MaurerPresident da la Confederaziun

Ils daners manchian, recloma Ueli Maurer, quai chaschunia che la qualitad sa sminueschia. Ozendi stoppian ins be pli leger duas u trais gasettas, il rest saja «mainstream». Avant la votaziun davart la refurma da taglia e finanziaziun da l'AVS ils 19 da matg, ha Ueli Maurer crititgà che las medias rapportian be a la surfatscha. Las medias na procurian betg ch'il project da votaziun vegnia pli chapibel per la glieud. Gia cun las formulaziuns en connex cun il project emprovian las medias da metter nà il project sco insatge memia cumplitgà.

Ils adversaris dal project crititgeschan la regenza ed il parlament perquai ch'els hajan cumbinà cun la refurma da taglia e quella da la finanziaziun da l'AVS duas chaussas che n'han da far nagut ina cun l'autra. Quai va tenor l'avis dals adversaris cunter la Constituziun.

«Jau crititgesch uschia sco las medias fan quai era»

Dumandà suenter anteriura critica che Maurer ha dà envers las medias, di el ch'el fetschia be il medem sco las medias e ch'el saja anc nunprivlus. El crititgeschia forsa ina giada mintga mez onn las medias, lezzas fetschian quai mintga di.

Tar la refurma da taglia e finanziaziun da l'AVS quinta Maurer cun in resultat fitg stretg. El vesia la schanza tar 50/50 ha el ditg en l'intervista. Tar la fatschenta vai per abolir privilegis da taglia per firmas internaziunalas, novas reducziuns e regulaziuns per interpresas sco era per ina squitta da finanzas per l'AVS.

Millis da plazzas en privel

Maurer avertescha ch'in NA a la refurma chaschunia ch'ins perdia la fidanza en la Svizra e ch'i dess lura ina perdita da taglia. Ad el sajan enconuschent dus cas a firmas che tegnian enavos investiziuns da milliardas. I giaja per millis da plazzas da lavur.

Ils adversaris da la refurma crititgeschan dasper la colliaziun da duas fatschentas er ch'i dess perditas da taglia pervi da novs privilegis per firmas e ch'i vegnia uschia bloccà ina dretga refurma da l'AVS.

RR novitads 10:00