Siglir tar il cuntegn

Header

video
Corona: finì cun isolaziun e mascrinas
Or da Telesguard dals 31.03.2022.
laschar ir. Durada: 2 minutas 33 Secundas.
cuntegn

Naginas mesiras pli Reagir individualmain en cas d'infecziun

I na vala nagin obligatori d'isolaziun pli per persunas infectadas ed era nagin obligatori da mascras en il traffic public ed instituziuns da sanadad. Quai vegnia segir a chaschunar novas infecziuns, ma betg pli talas undas, di la media chantunala Marina Jamnicki.

La media chantunala Marina Jamnicki di ch'i vegnia ad esser grev ils emprims mais da decider tge far, sch'ins haja in test positiv. Tar la lavur decida il patrun tge far. En il rom privat saja impurtant da communitgar bain. En il chantun Grischun saja stgars 90% da la populaziun immunisada, cun quai che 70% da las persunas han la prima vaccinaziun e lura anc ils auts dumbers da cas tras tut la pandemia. Ina nova unda na saja betg excludida, lura saja da far quint cun pli auts dumbers da cas positivs, ma paucas entradas en l’ospital, uschia la media chantunala vinavant.

I vegn a durar ina pezza fin che ina nova normalitad vegn sa stabilisar.
Autur: Marina Jamnicki Media chantunala dal Grischun

Era la regenza grischuna è cuntenta cun las decisiuns

Il minister da sandad dal Grischun Peter Peyer va d'accord cun la decisiun dal Cussegl federal. La situaziun en ils ospitals lubeschia da far quest proxim pass ed abolir tut las mesiras. Il Grischun n'haja perquai era betg previs da mantegnair insatge mesiras cunter corona.

audio
«Nus essan dal avis ch'ins po prender individual mesiras là nua ch'i è necessari»
ord Novitads dals 30.03.2022.
laschar ir. Durada: 29 Secundas.

Il chantun veglia dentant restar attent e persequitar vinavant la situaziun da corona. Perquai duai er in pitschen team restar activ tar l'Uffizi da sanadad – per persunas che han dumondas ubain per esser flexibel en cas che las infecziuns s'augmentan puspè.

Cussegl federal schlia tut las mesiras da corona

La Svizra è dapi il prim d'avrigl en la «situaziun normala». Cun quai crodan er las davosas mesiras: I vala nagin obligatori d'isolaziun per persunas infectadas ed era nagin obligatori da mascras en il traffic public e las instituziuns da sanadad. Il Cussegl federal argumentescha sia decisiun cun quai ch'ina gronda part da la populaziun saja immunisada e ch'il dumber da pazientas e pazients da Covid sin las staziuns intensivas n'haja betg prendì tiers. Sper quai na saja er betg da quintar ch'il sistem da sanadad vegnia surchargià ils proxims mais.

video
Enavos a situaziun normala suenter dus onns pandemia
Or da News-Clip dals 30.03.2022.
laschar ir. Durada: 28 Secundas.

Undas da corona stagiunalas

Malgrà che la Svizra turna uss a la «situaziun normala», na saja la pandemia betg a fin, accentuescha il Cussegl federal. Co che quella sa sviluppeschia saja grev da giuditgar – ins quintia dentant ch'i dettia en l'avegnir undas stagiunalas da corona.

audio
A partir dal 1. d'avigl scrodan tuttas mesiras
ord Actualitad dals 30.03.2022.
laschar ir. Durada: 5 minutas 15 Secundas.

Enfin la primavaira 2023 vala ina fasa transitorica, nua ch'ins stoppia esser precaut e tut tenor reagir. Perquai ston las structuras vegnir mantegnidas per pudair reagir sche necessari. Cun midar a la «situaziun normala» va la responsabladad principala per proteger la populaziun als chantuns, uschia èsi reglà en la lescha d'epidemias. Co exact che las incumbensas e responsabladads vegnan repartidas va anc enfin ils 22 d'avrigl en consultaziun.

Survista da las etappas da corona

Avrir la box Serrar la box

Questas fasas da la lescha d'epidemias hai dà en Svizra:

  • Fasa normala - avant ils 28 da favrer 2020
  • Situaziun extraordinaria a partir dals 28 da favrer 2020
  • Situaziun speziala a partir dals 19 da zercladur 2020
  • enavos a la situaziun normala a partir dal prim d'avrigl 2022

RTR novitads 15:00

Artitgels legids il pli savens

Scrollar a sanestra Scrollar a dretga