A partir da dumengia è la Svizra per l'emprima giada commembra dal cussegl da segirezza da las Naziuns Unidas. Quai per dus onns. L'assamblea generala aveva approvà il zercladur la candidatura da la Svizra per in sez betg-permanent en il Cussegl – quai cun 187 da 192 vuschs. Commember da las Naziuns Unidas è la Svizra gia dapi 20 onns.
Il Cussegl federal ha quatter prioritads per quest temp:
- promover ina pasch durabla
- proteger la populaziun civila
- promover la protecziun dal clima
- rinforzar l'effizienza dal cussegl
Da la Svizra vegn spetgà ch'ella fa punts e ch'ella saja nunpartischanta, ha ditg Pascale Baeriswyl, l'ambassadura svizra a l'ONU che represchenta la Svizra. Ina buna chaschun perquai pudess esser il matg da quest onn perquai che lura maina la Svizra las sesidas e po era radunar debattas.
Na vegn betg uschè simpel pervia da la guerra en l'Ucraina
Pervia da la guerra en l'Ucraina è il cussegl da segirezza, nua che la China, la Frantscha, la Gronda Britannia, la Russia ed il Stadis Unids han il dretg da veto, fitg dividida. Uschia na vegni betg ad esser uschè simpel per la delegaziun svizra.
