La proxima exposiziun naziunala cun il titel «Nexpo» duai avair lieu pir il 2032 e betg gia en quatter onns sco planisà oriundamain. Quai han annunzià las 26 citads e vischnancas che vulan realisar l'exposiziun.
L'uniun Nexpo reagescha uschia sin il conclus dal Cussegl federal che ha annunzià la fin da mars da betg vulair decider avant il 2028 davart in sustegn finanzial per la proxima exposiziun naziunala. La raschun saja la situaziun finanziala tendida da la Confederaziun. L'uniun Nexpo pretend ussa dentant dal Cussegl federal in urari liant per augmentar la segirtad da planisar.
Fin en trais onns duai crudar la decisiun tge project che duai vegnir realisà. Dasper Nexpo datti numnadamain aunc trais auters projects che vulan realisar in'exposiziun naziunala. Il project «Svizra27» en il nordvest da la Svizra, plirs chantuns muntagnards han lantschà il project «Muntagna» ed ina gruppa da 50 organisaziuns vul realisar in'exposiziun sut il titel «X27».
