L'um da Cuira ch'è in passiunà dal sport – en sia vita professiunala sco er en la vita privata – ha fatg in num sco CEO da diversas associaziuns ed interpresas en la branscha da sport. Tranter auter ha el manà Swiss-Ski e l'Arena Alva.
L'onn passà ha el mess tut sia energia en il cumbat electoral per il presidi da l'associaziun tetgala dal sport svizzer Swiss Olympic. Quel ha el la finala spers encunter l'anteriura cussegliera federala Ruth Metzler-Arnold. Questa terrada saja gia daditg magunada, di Markus Wolf, ed el saja bain spert puspè stà avert per novas pussaivladads e schanzas professiunalas.
Ina nova sfida tar la Movemi SA
L'incumbensa che ha persvadì il pli fitg Markus Wolf è il post da CEO tar la Movemi SA ch'el cumenzà l'auter onn. La Movemi SA è la pli gronda purschidra da fitness da la Svizra e preschenta en 140 lieus. Ses nov lieu da lavur ed uschia era ses lieu da dimora durant l'emna vegn ad esser Turitg. Surpigliar quest post da CEO cumbineschia bleras da sias qualificaziuns, di l'um da 52 onns. E malgrà ch'el haja enfin uss anc pauca experientscha en la branscha da fitness saja el segir da sia decisiun e sa legria sin quella nova sfida.
Collaboraziun cun Ruth Metzler-Arnold
Plinavant è Il Grischun er anc part da la Fundaziun per la promoziun dal sport svizzer ed en questa funcziun sesa el mintgatant visavi a sia anteriura concurrenta Ruth Metzler-Arnold. «Là vai persuenter co finanziar Swiss Olympic l'onn 2027 enfin 2030 e nus vegnin dumandads per sustegn finanzial. Il cussegl da fundaziun dumonda lura als chantuns per metter a disposiziun quels daners. Ed en questa funcziun discutain nus gia puspè en moda constructiva davart l'avegnir dal sport svizzer.» Uschia vesian ins era co las circumstanzas possian mintgatant sa midar spert – quai che saja gea era insatge tipic dal sport.
