6'064 ansiels-chavriel han dronas spendrà quest onn da la mort entras segar en Svizra. Sco l'uniun «salvament d'ansiels-chavriel» communitgescha, saja quai dapli ch'il dubel da l'onn passà ed in nov record. Ina giada haja quai da far cun il fatg ch'ins haja scolà dapli pilotas e pilots da dronas, uschia ch'igl ha dà radund in terz dapli teams da dronas che l'onn passà. In auter motiv saja ch'igl haja pluvì bler enfin mez matg, uschia ch'ils purs hajan cumenzà pli tard a segar. Quai ch'haja medemamain gidà, saja ch'ils chavriels hajan fatg ansiel pli tard pervi da la vegetaziun.
Mintga pilot e pilota ha quest onn cuvert 86 hectaras surfatscha, cumpareglià cun 68 hectaras l'onn passà. Ed intgins teams han pudì profitar da dronas messas a disposiziun da la Protecziun svizra dals animals.
Or da l'archiv
