Ch'ils pulschains masculins vegnan mazzads damai ch'els na pon betg metter ovs, è adina puspè in tema. L'uniun tetgala da purs e puras da bio Bio Suisse vul uss midar quai.
A partir dal 2026 n'èsi betg pli lubì da mazzar ils cots suenter ch'els èn cuads ora. Davent da lura valan novas prescripziuns. La dumonda resta, co nizzegiar ils cots, e co pajar per ils ulteriurs custs. Arno Capaul d'Andiast ha gia cummenzà cun midadas.
Tegnair pli ditg las giaglinas
Sch'el tegna pli ditg las giaglinas, lura na sto el er betg procurar per uschè blers pulschains. Uschia tegn el gia uss giaglinas 15 mais per ovar, enstagl da 12. Quai porta dischavantatgs: Las giaglinas na mettan betg pli uschè blers e buns ovs, cura ch'ellas èn pli veglias. Ad el custa quai in pèr milli ovs l'onn.
Tge duai dentant capitar cun ils cots davent dal 2026? D'engraschar quels na saja betg rentabel, di il pur Roman Clavadetscher da Malans. Ils cots creschan numnadamain pli plaun che las giaglinas. Ed il bain n'haja er betg l'endretga razza per producir pulaster.
Per ch'i rendia d'er tegnair ils cots e vender lura il pulaster, dovri ina razza cun niz dubel, di Roman Clavadetscher. El è pur e sa participescha al program «Giaglina e Cot». Quel ha gia uss cumenzà a laschar viver ils cots, voluntariamain. Per ch'i renda da tegnair er ils cots, dovri ina razza cun uschenumnà niz dubel. Pia ina che po uvar bun ed er crescher svelt e dar bler charn.
Fin ch'i dettia ina tala razza, uschia ch'i rendia, dovria anc in temp, di Claudio Gregori da Bio Suisse. L'uniun tetgala dals manaschis da bio recumonda dentant gia uss da duvrar ina razza cun niz dubel.
Er las consumentas ed il commerzi en detagl sto s'adattar
Roman Clavadetscher di ch'i dependa vi dal commerzi en detagl. Quel stoppia prender si il pulaster dals cots en il sortiment. Ed Arno Capaul d'Andiast di ch'ils consuments e las consumentas d'ovs da bio stoppian la fin pajar. Quai custia 5-6 raps per ov dapli. Cun quels pajan las consumentas ed ils consuments per il plaz ed il pavel dals cots.
