En differents lieus è il termometer ì pult ad ault ils dis enturn Nadal. Cunzunt en il Tessin hai dà temperaturas fitg miaivlas, quai cun 21,8 grads a Biasca e 20,8 grads en la Val Maggia, quai scriva SRF Meteo. Questas duas staziuns da mesiraziun èn pir dapi intgins onns en funcziun, perquai na possian ins betg far cumperegliaziuns a lunga vista. A Stabio sper Chiasso però han ins mesirà 18,9 grads. Uschè chaud na saja anc mai stà ils 24 da december dapi l'entschatta da las mesiraziuns.
Er en il Grischun valurs da record
Er en autras regiuns ha SRF Meteo mesirà temperaturas uschè autas sco anc mai ils ultims 100 onns enturn Nadal. Uschia per exmpel a Poschiavo cun 15,6 grads ed a Sta. Maria cun 11,8 grads. Novs records hai er dà a Samedan ed sin il Pass dal Fuorn per ils 24 da december, quai cun 8,9 grads.
Suenter l'aria polara suonda naiv e lura lieua quai
L'aura da las ultimas emnas haja sistem, scriva SRF Meteo. Fin november cumenza en Scandinavia la notg polara. Entras quella vegn aria fraida en l'Europa Centrala. Savens porta quella la fin november ed il cumenzament da december naiv enfin en la Bassa. Er mez december datti savens naiv en Svizra. Quai è er stà il cas quest onn.
Suenter va l'aria fraida viers l'Atlanitic, ch'ha aria miaivla. Quai ha per consequenza che las temperaturas van ad aut en Svizra e ch'i lieua. Savens saja il cunfin da naiv lura sin passa 1500 meters sur mar. Questa giada enturn Nadal è il cunfin da naiv stà tranter 1800 e 2500 meters sur mar.
