Siglir tar il cuntegn

Header

cuntegn

Aura Vents burascus laschan suenter in zic

Suenter ils dis burascus cun la blera plievgia e naiv en las muntognas vegni da Nadal puspè pulit bel, era sch'igl è magari in zic surtratg ed i suffla magari er anc in zic. Quest onn pon ins uschia en bleras regiuns da muntogna festivar in Nadal alv. En la Bassa vesi or in zic auter, là ston ins esser cuntent cun in Nadal in zic pli verd.

Tgi che va cun skis po er sa legrar. En las muntognas hai fin la sonda bun'ura navì sur 1'500 meters sur mar – quai per part cun 30 centimeters naiv nova.

Record da naiv?

Tar tschertas staziuns da mesiraziun saja in record da naiv da Nadal betg lunsch davent, scriva SRF Meteo. Sin il Weissfluhjoch sur Tavau sin 2'536 meters hai actualmain 202 centimeters naiv. Il record da Nadal è là tar circa 210 centimeters. Mesirà vegn dapi 90 onns. Sin Motta Naluns en l'Engiadina Bassa han ins gia cuntanschì mez december in record d'autezza da naiv.

Temperaturas chaudas en il sid

En il Tessin n'han ins la sonda betg duvrà ina giacca chauda. La sonda èn las temperaturas maximalas stadas a Biasca tar 22 grads ed a Locarno tar 20,2 grads. Sin Nadal sa sbassan quellas in zic, ma restan vinavant autas per quest temp da l'onn.

Burascus

Il stemprà che furiescha dapi la gievgia sur la Svizra è tenor SRF Meteo dentant vegnì in zic pli flaivel la sonda, cumpareglià cun ils dis avant. Tuttina han ins mesirà fermezzas da vent da fin 142 kilometers l'ura sin il Jungfraujoch BE ed il Gornergrat VS. Era en l'ost da la Bassa è il vent stà fin a 90 kilometers l'ura.

Il stemprà duai tenor indicaziuns dad SRF Meteo vegnir pli flaivel en il decurs da la sonda. I vegnia dentant er a restar burascus ils dis che vegnan, uschia il servetsch da l'aura.

I gida da far ferm il pignol da Nadal u illuminaziuns. Era da far ina spassegiada en il guaud durant il temp burascus n'è betg da recumandar.
Autur: Jürg Zogg SRF Meteo
audio
Naiv, plievgia ed aura burascusa
ord Actualitad dals 21.12.2023. Maletg: Keystone
laschar ir. Durada: 2 minutas 22 Secundas.

Lavinas

Tanta naiv maina er ad ina situaziun pli critica da lavinas e sin las vias. Il SLF a Tavau ha infurmà ch'il privel da lavinas è s’augmentà en tut il Grischun. In grond privel da lavinas, staglim 4 vala per la vart sanestra dal Rain Anteriur, il Signuradi, il Partenz e l'Engiadina Bassa in privel da lavinas grond, stgalim 4. Per il rest dal chantun vala in privel da lavinas considerabel, staglim 3. Igl è da resguardar las mesiras localas, pia sche territoris da skis u vias èn serradas.

Ils stgalims da privel da naiv

Avrir la box Serrar la box

La Confederaziun ha partì en la scala da privels en tschintg stgalims. Ma tge munta i propi, sch’i ha num «privel stgalim 4»? In’explicaziun.

Stgalim 1 (nagin u in pitschen privel)

Stgalim 2 (privel moderà)

  • Privel da glischnar sin vias cuvertas cun naiv

Stgalim 3 (privel considerabel)

  • Agravament da charrar sin las vias
  • Impediment dal traffic aviatic e dal traffic da viafier
  • Roma che rumpa sut la chargia da naiv

Stgalim 4 (grond privel)

  • Vias cun trajects nunpassabels
  • Impediment dal traffic aviatic e dal traffic da viafier
  • Roma che rumpa sut la chargia da naiv u plantas che sa derschan
  • Eventualmain datti interrupziuns dal provediment d'electricitad e da las colliaziuns da telefon
  • Gronda chargia da naiv sin ils tetgs

Stgalim 5 (fitg grond privel)

  • Interrupziun dal traffic sin via e da l'aria
  • Impediment massiv dal traffic da viafier
  • Roma che rumpa sut la chargia da naiv u plantas che sa derschan
  • Immensa chargia da naiv sin ils tetgs
  • Eventualmain datti interrupziuns dal provediment d'electricitad e da las colliaziuns da telefon

RTR actualitad 12:00

Artitgels legids il pli savens