A partir da glindesdi vala in obligatori da mascras en il traffic public. Toni Häne, manader dal traffic da persunas tar las Viafiers federalas, ha declerà ch'i saja da purtar dapertut en il traffic public ina mascra. Plinavant vegnian las regulaziuns d'enfin ussa agiuntadas cun l'obligatori da mascras. Il persunal dal traffic public na gioghia plinavant betg polizia. Els na repartian betg chastis e mettian empè sin l'atgna responsabladad.
Persunal da controlla duai far la segira che las persunas portian er vairamain mascras. Els duain far attent persunas che na resguardan betg l'obligatori. Tal persunal haja era la cumpetenza da supplitgar glieud da bandunar trens u postas che na sa tegnia betg vid questa mesira. Els han er la cumpetenza da clamar las autoritads correspundentas en cas extrems. Vinavant resta la part davant da las postas serrada sco enfin qua, quai per proteger ils manischunzs.
Avrir cunfins ils 20 da fanadur
Per stadis terzs vul la Confederaziun avrir ils cunfins ils 20 da fanadur. Cornelia Lüthy, vicedirectura dal Secretariat da stadi per migraziun, ha declerà ch'i na dettia naginas restricziuns als cunfins, per persunas da stadis da Schengen. N'er betg sin la via sur l'aria. Tuttina possian ins decider ina quarantina per persunas che vegnian da stadis ch'èn sin la glista dal BAG. Uschia ston persunas che vegnan da la Svezia ir en quarantina. U per exempel er Franzos che vegnan dals Stadis Unids.
Sco Patrick Mathys dal BAG ha declerà suenter ina dumonda d'ina schurnalista saja quai propi uschia che la Confederaziun haja las infurmaziuns necessarias tar persunas che sgolan en Svizra. Tar persunas che turnian cun auto per exempel sur la Germania, na sappian ins betg controllar quai. Ins mettia sin l'atgna responsabladad da la glieud. Ma, ins possia fa controllas punctualas. Plinavant guardian ins per exempel cun lingias da bus che giajan en tals pajais periclitads, da vegnir vid las medemas infurmaziuns sco tar il sgular.
Tgi paja la quarantina?
Ina quarantina perquai ch'insatgi è stà en in dals pajais da ristg, na vegn betg pajada. Ils lavurants ston lura pigliar qua vacanzas nunpajadas. Perquai scusseglia il BAG cler da viagiar en tals pajais. Sch'il BAG dat ina tala ordra, lura hajan tschertas assicuranzas da viadi en qua ina clausula. In'annulaziun duess esser pussaivla.
Situaziun internaziunala betg legraivla
L'egliada sin la situaziun internaziunala na fa betg plaschair, ha ditg Patrick Mathys, il manader da la secziun superaziun da crisa e collavuraziun internaziunala dal BAG. I dettia differents hotspots: En ils Stadis Unids hai dà ier malgrà novas mesiras 52'000 novas infecziuns. Er en Brasilia ed en Russia saja la situaziun precara.
En ils pajais vischins mussia il trend sco en Svizra suenter in temp puspè envers ensi. En Svizra vul ins puspè cuntanscher il stan sco mez zercladur. Actualmain sa chattian 12 persunas sin staziuns intensivas. Cun las mesiras decididas mesemna (obligatori da mascras en il traffic public e quarantina), vulan ins puspè cuntanscher quest livel.