Cunter las mesiras da corona restantas vegni demonstrà vinavant. Pliras tschient persunas èn sa radunadas oz ad Oerlikon en il chantun Turitg. Ellas han pretendì da stritgar l’obligatori da mascrina che vala en il traffic public. Dapi gievgia è quai quasi la suletta mesira da corona che vala anc en l’entira Svizra.
Plinavant han demonstrantas e demonstrants pretendì da schliar immediat la situaziun speziala. Il Cussegl federal aveva annunzià dad abolir quella fin la fin da mars – tut tenor decurs da la pandemia gia pli baud.
La demonstraziun lubida saja stada paschaivla. Appellà da demonstrar han pliras organisaziuns d'adversaris da mesiras da corona. Pervia da la demonstraziun hai dà impediments sin las vias ed il traffic public.