En sasez avess la CS gì da publitgar gievgia avant in'emna ses rapport da gestiun. Quel è dentant vegnì spustà perquai che l'autoritad da surveglianza da la bursa ha anc vulì scleriment en dumondas da detagl. Quellas paran uss d'esser scleridas.
Indemnisaziuns pli bassas
L'indemnisaziun per ils top managers è quest onn tar 32,2 milliuns francs, cumpareglià cun ils 38,1 milliuns da l'onn 2021. Sco gia annunzià, ha la direcziun da la banca desistì quest onn da lur bunificaziun. Raschun è il resultat miserabel da l'onn passà.
Er ils ulteriurs emploiads ston desister almain per part. Sco gia annunzià pli baud èn stads a disposiziun per il 2022 be la mesadad dals daners per bonus. Total vegnan pajads ad emploiadas ed emploiads uschia be radund 1 milliarda francs empè da 2 milliardas francs, sco l'onn 2021.
2,5 milliuns per CEO Körner
Il CEO da la Credit Suisse, Ulrich Körner, che ha surpiglià l'entschatta avust ses post, survegn 2,5 milliuns indemnisaziuns per l'onn passà. L'anteriur CEO, Thomas Gottstein ha gudagnà l'onn 2021 anc 3,8 milliuns francs.
Las pli bleras indemnisaziuns hai dentant dà il 2022 per il schef da finanzas partent David Mathers. El ha survegnì 3,9 milliuns francs.
Lehmann desista da bonus da president
Il president dal cussegl d'administraziun, Axel Lehmann survegn total 3,2 milluns francs. El ha desistì da ses bonus ch'el avess da bun sco president. Quai èn 1,5 milliuns francs.
Total ha il cussegl d'administraziun survegnì per las radunanzas generalas 10,4 milliuns francs, cumpareglià cun 11,7 milliuns l'onn avant. Per la perioda tranter ils onns 2023 e 2024, duai quel anc survegnir total 13 milliuns.
Scul monetar cuntinuescha
Il rapport actual mussa che la CS ha anc adina da cumbatter cunter in scul monetar. Bain saja la situaziun sa stabilisada, sin nivel bass. Pia pli pauca clientella che ha bandunà la banca cun lur daners, ma anc adina n'è la situaziun betg sa vieuta. En l'entir onn da gestiun 2022 han clientas e clients retratg facultads en la valita da 123 milliardas francs. Da quai radund 111 milliuns en il quartal final.
La Credit Suisse aveva serrà l'onn da gestiun 2022 cun ina perdita da 7,3 milliardas francs. Gia l'onn avant aveva la banca fatg ina perdita annuala dad 1,6 milliardas francs.
