Chantuns da la Svizra tudestga vulan cuntinuar da far operaziuns che na sajan betg urgentas. Malgrà la crisa da corona, hajan els anc avunda capacitads. Quai ha ditg la directura da sanadad dal chantun Turitg, Nathalie Rickli, en l’emissiun «10 vor 10» da SRF. Rickli vul che mo ina part da las operaziuns vegnian stritgadas. Il minister da sanadad, Alain Berset, aveva crititgà ils chantuns che lubeschian vinavant operaziun che na sajan betg exnum necessarias.
En la Svizra franzosa datti percunter adina pli pauc letgs libers sin las staziuns intensivas. Turitg e Berna han gia surpiglià pazients da Covid-19 da la Svizra franzosa.
Er Grischun na stritga betg operaziuns
La media chantunala dal Grischun ha er declerà ier a las medias ch'ils ospitals grischuns na stritgian il mument betg operaziuns. La situaziun saja il mument survesaivla.
Ma, er en Grischun saja da quintar ch'i dettia il proxim temp dapli cas sin las staziuns intensivas. Raschun è che pazients cun corona, restian savens pli ditg sin las staziuns. Perquai giaja la curva enavos pli plaun che tar ils cas da corona activs.
