L'Acziun per ina Svizra independenta e neutrala na vegnia bainprest betg pli a dar en la furma actuala. Las delegadas ed ils delegads han decis a Berna da fusiunar cun duas organisaziuns sumegliantas – numnadamain cun l’Associaziun d’interprendiders cunter l’entrada en l’UE e cun il comité «EU-No». La midada dals statuts hajan ins approvà cun gronda maioritad hai num en ina communicaziun da la Auns. Il num da la nova organisaziun n'è anc betg definì – il titel da lavur per il project saja «PSS – Pro Svizra suverana». La fundaziun duai esser ils 15 d'october a Berna.
Puspè savair gudagnar votaziuns
La finamira saja, ch'il moviment saja puspè bun da gudagnar votaziuns. Quai ha ditg l’anteriur Cusseglier federal ed in dals confundaturs da l’Auns, Christoph Blocher. En il center stat vinavant l'engaschament per ina Svizra independenta, neutrala, suverana e segira.
La Auns è vegnida fundada il 1986. Il pli grond triumf politic era il 1992, cura ch'il suveran svizzer ha ditg Na a l'adesiun al Spazi economic europeic (EWR).