Siglir tar il cuntegn

Header

cuntegn

Ospitals e assicuranzas Medema qualitad en l'entira Svizra

Ina nova cunvegna naziunala duai segirar en l'avegnir ch'i dat en ils ospitals e las clinicas svizras ina qualitad e segirezza da pazientas e pazients unitara. Suttascrit ed inoltrà quella al Cussegl federal han l'associaziun dals ospitals H+ e las associaziuns tetgalas da las assicuranzas da malsauns. Sch'il Cussegl federal approvescha la cunvegna, ston ospitals e clinicas en l'avegnir realisar mesiras unitaras per segirar la qualitad. Plinavant ston els lavurar cuntinuadamain vi da megliuraments.

«Crap da miglia»

Per ils contrahents saja quella emprima cunvegna naziunala in «crap da miglia» per la qualitad e segirezza da pazients en ospitals e clinicas. Gia oz saja il svilup dal contract fixà. Ils contrahents hajan sa cunvegnì a vasts elements, cun ils quals ils ospitals e las clinicas sviluppan la qualitad e la segirezza da pazients a moda lianta, unitara e transparenta. In post da controlla independent controllescha il svilup da la qualitad en ils ospitals ed en las clinicas sporadicamain.

Era la conferenza da las directuras e directurs da sanadad cantunals benventass quellas novas mesiras. Tge che las consequenzas concretas per las instituziuns da sanadad sajan exact, saja uss dentant anc memia baul da dir. Quei dependi tut dal cuntegn specific da quella cunvegna.

RTR novitads 15:00

Artitgels legids il pli savens