Il med da pajament digital Twint daventa adina pli popular en Svizra. L’onn passà hajan Svizras e Svizzers fatg 590 milliuns transacziuns cun Twint. Cumpareglià cun l’onn avant saja quai in augment da 50%, ha communitgà l’interpresa. I dettia passa 5 milliuns utilisader ed utilisadras.
Cunzunt s’augmentadas sajan las transacziuns en ils supermartgads. Tenor Twint porschan 77% da las butias e 76% dals shops online en Svizra la pussaivladad da pajar cun Twint. Bunamain trais quarts da las transacziuns sin la plattafurma vegnian ord il commerzi – il rest sajan transacziuns tranter persunas privatas.
Lantschà il 2017
Lantschada è l’applicaziun vegnida il 2017. Lura sajan vegnidas registradas 4'000 transacziuns. Twint è en possess da las pli grondas bancas svizras (Banca chantunala dal Vad da Turitg, Credit Suisse, Postfinance, Raiffeisen ed UBS) e dals gestiunaris da pajaments SIX e Worldline.
