Il temp dal certificat da Covid pudess bainprest esser istorgia en Svizra. Quai ha ditg il minister da sanadad Alain Berset en la gasetta «Schweiz am Wochenende». Sche la situaziun epidemiologica sa sviluppeschia a moda positiva, possia il Cussegl federal midar las proximas emnas l’obligatori da far homeoffice en ina recumandaziun da lavurar davent da chasa.
Plinavant possia el er abolir la quarantina. Persunalmain craja el che la situaziun vegnia meglra. Dentant saja il virus gia pliras giadas stà imprevisibel.
Emprima schluccada
La Svizra schlucca a partir dad oz las mesiras da corona per entrar en il pajais. Quai en vista al cumenzament da las vacanzas d’enviern. Da nov vala la regla da 3G ed i sto vegnir testà damain. Concret ston mo pli persunas mussar in test negativ, ch’èn ni vaccinadas ni guaridas.
En pli desistan las autoritads er dal segund test da corona quatter enfin set dis suenter l’entrada. Quai pervi da las capacitads da testar limitadas. Persunas vaccinadas u guaridas na ston betg pli far in test avant entrar en il pajais.
