La Confederaziun tema d'ina ulteriura derasaziun dal bau giapunais. L'uffizi federal per agricultura appellescha perquai a la populaziun dad esser alerta. Il parasit possia vegnir en l'auto u en il tren senza ch'ins sa fetschia en ed uschia far lungas distanzas, hai num en la communcaziun.
Il bau magliadrun sa nutrescha da passa 400 sorts da plantas ed è uschia in grond privel per l'agricultura e l'ambient. Tgi che vesia il bau duaja pigliar quel e s'annunziar tar il servetsch per la protecziun da plantas chantunal. Il bau giapunais sumeglia a la buccaria, ha però tschofs da chavels sin la part davos.
L'emprima giada cumparì il 2017 en Svizra
L'emprima giada è il bau dal giapun cumparì il 2017 en Svizra. El saja vegnì da l'Italia en il Tessin e pli tard arrivà en il territori da Simplon en il Vallais. L'onn passà han ins constatà ina derasaziun en il chantun da Turitg, l'emna passada era en ils chantuns da Basilea champagna e citad. Tranter auter han ins pervia da quest bau stuì volver enturn il prà da trenament da l'equipa da ballape FC Basilea e Münchenstein BL.
Cun il traffic da return da las vacanzas existia il privel ch'il bau vegnia er importà en autras regiuns da la Svizra, scriva l'uffizi federal vinavant. Uschia ch'el supplitgescha a la populaziun da controllar bain la valischa ed ils autos.
Tgi che vesa uschè in bau dal giapun duai immediat pigliar quel e far in'annunzia tar il servetsch da protecziun da las plantas dal chantun, scrivan las autoritads. Il bau dal giapun vesa dentant ora fitg sumegliant sco las sorts indigenas sco la buccaria, scriva l'uffizi federal vinavant.
Baus dal giapun creschids ora èn 10 fin 12 milimeters lungs ed èn da colur verd-metallic cun alas brinas. Sin la part davos han quests baus tschofs da chavels.
Or da l'archiv: