Sch'ins fa ina rangaziun tenor partida, lura han politicras e politichers da l'EDU la pli auta cumpart da mandats pajads. Da las partidas grondas suondan l'Allianza dal Center e la PPS. Quai mussa l'analisa da la plattafurma Lobbywatch.
Cleramain pli paucs mandats pajads d’ina interpresa u d’ina associaziun èn da constatar tar la PS e tar il Verds.
Tut ils mandats da Martin Schmid èn pajads
Ils blers mandats pajads ha il cusseglier naziunala Peter Schilliger (LU) cun 18 mandats pajads. Cun 16 mandats suonda il cusseglier grischun Martin Schmid ensemen cun plirs auters parlamentaris sin plaz 2, tut ses mandats vegnan tuts indemnisads. Tranter ils top 25 sa chatta er il cusseglier grischun Stefan Engler, cun 10 da 12 mandats pajads.
La retschertga da Lobbywatch mussa era, che cussegliers profiteschan cleramain pli ferm d’engaschaments pajads che cusseglieras. Sulettamain 29 pertschient da tut ils mandats pajads en il Cussegl naziunal ed en il Cussegl dals chantuns èn en ils mauns da dunnas, quai tar ina cumpart da dunnas en il parlament a Berna da 39 pertschient.
Il sectur da l’energia cun ils blers mandats pajads
Sch’ins analisescha ils mandats pajads tenor branscha, lura pajan firmas ed associaziuns dal sectur da l’energia il pli savens parlamentaris per posts en cussegls d’administraziun u auters gremis. 60 pertschient da tut ils mandats da la branscha da l’energia vegnan indemnisads. Betg bler damain èsi tar ils mandats da l’economia e da l’agricultura, cun mintgamai 56 pertschient.
A la fin da la rangaziun èn ils mandats dal sectur da l’ambient, cun sulettamain 18 pertschient dals engaschaments pajads. Tar la cultura èn quai 8 pertschient e tar las relaziuns cun l’exteriur (politica, economia) 3 pertschient.
Dapi l'entschatta da la legislatura actuala ston commembras e commembers dal Cussegl naziunal e dal Cussegl dals chantuns inditgar – per tge mandats ch'els vegnan pajads e tgenins ch'els fan gratuitamain.