Siglir tar il cuntegn

Header

video
La app da «Contact-Tracing»
Or da RTR Social dals 05.05.2020.
laschar ir
cuntegn

Parlament chaschuna retard App da corona vegn pir la stad

Ils sviluppaders da l'applicaziun per il telefonin han en sasez vulì cumenzar gia glindesdi proxim – ma ussa datti be ina versiun da test.

Il parlament a Berna ha decidì ch'i dovra sco emprim ina lescha per pudair chargiar l'app da corona sin il telefonin. Sco Damien Cottier cusseglier naziunal da la PLD ha declerà na saja betg il senn da franar il Cussegl federal cun l'app. Ma i na dettia simplamain betg la basa legala necessaria per introducir l'app. Quella saja necessaria perquai ch'i giaja per in'intervenziun en ils dretgs da basa, er sch'i saja voluntari da chargiar l'app sin il telefonin.

Il pli baud il fanadur

Il Cussegl naziunal ed in di avant er il Cussegl dals chantuns èn da quest avis. Quai munta ch'il Cussegl federal sto uss elavurar ina lescha federala urgenta per pudair lantschar l'app en Svizra. En la sessiun da stad duess quella lescha lura vegnir approvada d'omaduas chombras. Uschia po l'app vegnir lantschada il pli baud il fanadur.

Sch'i va tenor il Cussegl dal federal, duai l'app tuttina gia vegnir en funcziun pli baud, quai en furma da test, ha declerà cusseglier federal Alain Berset a SRF. Questa fasa da test pussibiliteschia als sviluppaders da rimnar experientschas e da testar quant solida che l'app è.

«Contact tracing» via app

Textbox aufklappenTextbox zuklappen

Tar il «contact tracing» emprovan ins da chattar ora cun tgi che la persuna infectada è stada en contact. Quellas persunas ston lura er ir en isolaziun, per far la segira ch'ellas na dettian betg vinavant il virus. Uschia vegnan ins da franar el pli spert. Cun agid da l'app fissi pli simpel da rimnar datas e lura infurmar tuttas persunas ch'èn stadas en vischinanza d'ina persuna infectada.

La Corea al sid ha pudì far il virus consequentamain cun rimnar datas dals telefonins e lura dar part a quellas persunas ch'ellas sajan stadas en contact cun insatgi ch'è vegnì testà positiv. En pajais europeics chaschunass quai dentant problems giuridics. Pertge da rimnar datas cuntrafa a dretgs da la protecziun da datas. Perquai vul il Cussegl naziunal stgaffir la basa legala.

Ord l'archiv:

video
Cun apps cunter la pandemia
Or da 10vor10 dals 25.03.2020.
laschar ir

RTR novitads 07:00

Artitgels legids il pli savens

Scrollar a sanestra Scrollar a dretga