Suenter il Cussegl naziunal ha gievgia er il Cussegl dals chantuns ditg Gea a la refurma da la chascha da pensiun. Venderdi ha lura il parlament approvà la refurma en la votaziun finala cun 113 cunter 69 vuschs tar 15 abstenziuns.
La refurma cuntegna:
- La reducziun da l'uschenumnada tariffa da conversiun da 6,8% sin nov 6%. Quai munta ch'i vegn pajà or pli pauc rentas. Per ina part da las annadas da la generaziun da transiziun datti dentant in'indemnisaziun da enfin 200 francs.
- La reducziun da la summa dal salari minimala per esser segirads da 22'050 francs sin 19'845 francs. Uschia èn circa 70'000 persunas da nov segiradas en la segunda pitga.
Critica da sanestra e da purs
Sut il stritg custia la refurma bler e portia pauc, cunzunt a las persunas cun entradas bassas. A lezzas vegn tratg giu dapli da la paja, mo cura ch'ellas giajan en pensiun tanschia l'AVS ensemen cun la renta tuttina betg per viver. Ils sindicats ensemen cun la sanestra han perquai er gia annunzià il referendum.
L'uniun purila da la Svizra crititgescha en emprima lingia la midada tar la deducziun da coordinaziun. Nov duain 80% da la paja esser segiradas. Quai munta sin 80% ston las persunas emploiadas sco era ils patruns pajar contribuziuns a la cassa da pensiun. Tar pajas plitost bassas, ch'èn derasadas en l'agricultura, è quai dapli che oz. La refurma custia perquai memia bler e na saja betg pli supportabla per ils purs, di l'uniun purila svizra.
Schanzas a l'urna
En il Parlament federal sent'ins l'opposiziun cunter la refurma. Cuntent n'è nagin propi. Malgrà quai hai dà ina clera maioritad a favur da questa refurma en il Cussegl naziunal. Quai dentant era perquai ch'ina buna part, cunzunt represchentants da l'agricultura, èn s'abstegna da la vusch.
La tenuta en il Parlament federal para d'esser la suandanta. Suenter trais onns debatta e discussiun, e suenter ch'ins ha durant il cumbat da votaziun per l'augment da la vegliadetgna da pensiun da las dunnas empermess da megliurar la situaziun da quellas en la segunda pitga, na pon ins strusch sa pristar da laschar ir da l'aua giu la refurma.
