Emetturs da radio en Svizra duain er pudair emetter via UKW suenter il 2026. Suenter il Cussegl naziunal ha er il Cussegl dals chantuns approvà ina moziun correspundenta cun 21 cunter 18 vuschs e 5 abstenziuns. Ussa sto il Cussegl federal elavurar la basa legala persuenter.
La terminaziun da l'UKW è actualmain planisada sin ils 31 da december 2026. La moziun pretenda dal Cussegl federal da desister sin quai ed enstagl prolungar las concessiuns dad UKW actualas. Alternativamain duai la regenza svizra far ina procedura da publicaziun per reparter las concessiuns dad UKW a partir dal 2027. Il minister da medias Albert Rösti ha annunzià en la debatta da far quai exact uschia. Be da prolungar las concessiuns existentas na saja betg pli giustifitgabel.
Il Cussegl dals chantuns è uschia suandà a la decisiun da sia cumissiun predeliberanta. Quella è sa mussada preoccupada suenter che la SRG SSR ha pers audituras ed auditurs da radio suenter avair tschentà giu UKW l'entschatta da quest onn.
Return immediat tar UKW n'è betg pussaivel
In return dals emetturs da radio da la SRG SSR, tar la quala er RTR tutga, sin la derasaziun da radio analoga sur UKW na saja betg pussaivel immediat. Quai conferma l'Uffizi federal da communicaziun BAKOM.
Ils onns 1910 è la tecnologia da radio vegnida adina pli populara per derasar lingua e musica. L'emprima staziun da radio en Svizra tudestga è stada il 1924 la «Radiogenossenschaft Zürich».
Ils 11 da settember 1924 è lura stà il culp da partenza per il rumantsch sin las undas da radio.
Quai è capità durant ils davos 100 onns
RTR ha pudì discurrer cun il directur da l'uffizi – el ha skizzà custs pussaivels per reactivar cumplettamain UKW en Svizra e dat invista en il process pussaivel.
Sch'i vegnia dà enavos ina concessiun da UKW, na possia quella betg pli vegnir admessa. Sche UKW vegnia prolungà, lura vegnia surdà novas concessiuns per l'entschatta 2027. Uschia cuzzassi anc passa in onn, fin che la SRG pudess returnar sin UKW. Sche la SRG tschentass ina tala dumonda, stoppian ins examinar sch'i dettia tut tenor excepziuns – uschia il BAKOM.
