L'ovra idraulica «Chlus» na vegn betg agiuntada sco 16avel project a la glista per projects da producziun d'energia che duain vegnir bajegiads cun prioritad. Il Cussegl naziunal ha refusà cun 98 vuschs Na cunter 91 Gea la proposta individuala da la cussegliera naziunala grischuna Magdalena Martullo. Quai scriva il biro da la cussegliera en ina communicaziun a las medias. Durant la debatta haja il project dentant survegnì sustegn dal cusseglier federal Albert Rösti. Il manader dal departament d'energia haja ditg, ch'il project stoppia exnum vegnir bajegià.
I va per l'uschenumnà decret general – che prevesa midadas tar pliras leschas d’energia. Part da quest decret fa era ina glista cun 15 projects, decidids ad ina maisa radunda cun chantuns, organisaziuns d'ambient ed concerns d'electricitad. Projects che duain vegnir realisads a moda prioritara. Magdalena Martullo è stada optimistica avant la votaziun da chattar cun sia proposta individuala ina maioritad en il Cussegl naziunal.
Glista na porta nagut
Pauca chapientscha per las stentas da Magdalena Martullo ha il mainafatschenta da la Pro Natura Grischun, Armando Lenz. Il project Chlus na tutga tenor l'organisaziun betg sin la glista. La Pro Natura Grischun na saja betg cunter la realisaziun da l'ovra en il Partenz, ed ins saja en stretg contact cun la Repower.
Quai n’accelerescha betg la realisaziun dal project. I procura mo per dapli malsegirtad.
