La populaziun svizra sustegna cleramain la participaziun a la Frontex. 71,5% han mess in Gea en l'urna ed uschia procurà fitg cler per il success da la fatschenta. Quai munta che la Confederaziun po augmentar la contribuziun dad oz 24 milliuns sin 61 milliuns francs per rinforzar l'agentura Frontex.
Tut ils chantuns han approvà la fatschenta e quai er cun gronda maioritad. Il chantun Genevra ha approvà la fatschenta il pli cnap, cun dentant anc adina 63,5% Gea.
Cler sustegn da la populaziun grischuna
Per la participaziun svizra a la Frontex, hai dà en Grischun ina decisiun fitg clera. 72,2% da la populaziun grischuna han votà per sustegnair l'Agentura europeica per la guardia da cunfin e da costa. La participaziun a la votaziun ha muntà a 43,5%.
Grischun: Participaziun svizra a la Frontex
Resultat
Il pli cler Gea ha ditg la vischnanca da Silvaplauna cun passa 83%. Il fin uss sulet Na è vegnì da Santa Maria en Calanca, cun in zic sur 51%.
Participaziun svizra a la Frontex
La Svizra è part da la rait da segirezza da Schengen. Ensemen cun ils auters stadis ch'èn part da la cunvegna da Schengen e Dublin sa participescha ella dapi passa 10 onns a l'Agentura europeica per la guardia da cunfin e da costa (Frontex). Perquai che la lavur vegn adina pli pretensiusa rinforza l'Uniun europeica la Frontex dapi il 2019 cun dapli daners e persunal. Cussegl federal e parlament èn da l'avis che la Svizra duai er surpigliar sia part tar quest rinforzament. Concret vai per auzar la contribuziun svizra da 24 sin 61 milliuns francs ad onn sco er per metter a disposiziun var 40 guardias da cunfin fin il 2027.
