Thierry Burkart è da nov a la testa da la Partida liberal-democratica. La radunanza da delegadas e delegads ha elegì Thierry Burkart. L'um da l'Argovia ch'ha 46 onns succeda a Petra Gössi ch'ha manà la partida dapi il 2016. El era il sulet candidat ed è vegnì elegì cun 296 tar 3 vuschs.
Tenor il giavisch da Thierry Burkart è il team a la testa da la partida da nov pli grond e funcziuna sumegliant ad ina direcziun generala. Per quai hai duvrà la midada dals statuts che la radunanza ha approvà. Sper il president datti perquai ussa quatter persunas che surpiglian in vicepresidi.
Midà statuts per avair 4 vicepresidentAs
- Andrea Caroni, cusseglier dals chantuns (AR)
- Philippe Nantermod, cusseglier naziunal (VS)
- Johanna Gapany, cussegliera dals chantuns (FR)
- Andri Silberschmidt, cusseglier naziunal (ZH)
Parolas per ils 28 da november
La partida ha era gist dà ora las parolas per ils 28 da november. Cun 291 Gea tar 10 vuschs han els detg Gea a la lescha da Covid. Cun il certificat saja pussaivel dad evitar serradas e scumonds. Cler Na dian els a l'iniziativa da tgira e l'iniziativa da giustia.
