Il cussegl da partida da la PS propona in ticket da dus per las elecziuns dal Cussegl federal. Quai ha la PS communitgà via il servetsch da novitads curtas X. Plinavant ha scrit il cussegl da partida da la PS che tut ils 6 candidats e candidatas sajan senza dubi qualifitgads per il ticket da la PS.
Il venderdi decida la fracziun da la PS en chasa federala davart la grondezza dal ticket. Sonda decida la PS alura definitivamain tgeninas candidatas e candidats che vegnan sin il ticket per il sez en il Cussegl federal. L'elecziun dal Cussegl federal ha lieu ils 13 da december.
Il cussegl da partida da la partida socialdemocratica datti dapi l'entschatta da l'onn 2022. El remplazza la radunanza da delegads e delegadas - e la direcziun. Il cussegl ha la funcziun d'in parlament per la partida e vegn manà da trais persunas.
Plinavant èn da la partida il presidi da la PS, represchentants da tut las partidas chantunalas e da las grondas citads, dals differents organs da la PS sco era da la JUSO. En pli èn diesch commembers da la partida ch'il cussegl elegia sez.
Las candidatas ed ils candidats per il ticket da la PS èn: il cusseglier naziunal bernais Matthias Aebischer, la cussegliera guvernativa bernaisa Evi Allemann, il cusseglier guvernativ da Basilea Beat Jans, il cusseglier dals chantuns turitgais Daniel Jositsch, il cusseglier naziunal dal Vad Roger Nordmann ed il cusseglier naziunal grischun Jon Pult.
