Siglir tar il cuntegn

Header

cuntegn

Svizra Paucas midadas en il Cussegl dals chantuns

En il Cussegl dals chantuns eran suenter l'emprim scrutin dals 18 d'october averts anc 19 dals 46 mandats. Ils 22 da november han l'Argovia ed il Turitg occuppà ils ultims 2 sezs averts.

12 chantuns han stuì ir en in segund scrutini per decider lur represchentants en il Cussegl dals chantuns. En 8 da quests chantuns n'aveva insumma nagin candidat cuntanschì il pli absolut.

Cun l'elecziun da Philipp Müller (AG) e Ruedi Noser (ZH) èn ussa però tut ils mandats repartgids. Ed auter ch'en il Cussegl naziunal na datti en il Cussegl dals chantuns betg il moviment a la dretga. En mintga cass betg in grond.

Il chantun Grischun vegn represchentà da Stefan Engler e da Martin Schmid.

RESULTATS CHANTUNS dals 18 d'october 2015:

Appenzell Dadora: Andrea Caroni elegì

Il cusseglier naziunal d’Appenzell Dadora, Andrea Caroni (PLD) è vegnì elegì en il Cussegl dals chantuns. Il giurist da 35 onns ha survegnì 12’308 vuschs tar in pli absolut da 7’461 vuschs. El era senza cuntracandidat.

Argovia: Pascale Bruderer elegida, 2. scrutini per 2. sez

Pascale Bruderer (PS) è vegnida elegida en l’emprim scrutini. Ella ha fatg 90'261 vuschs. Il candidat da la PPS, Hansjörg Knecht ha survegnì dapli vuschs (77'255) ch’il president da la PLD, Philipp Müller (71'445). Il pli absolut era tar 90'261 vuschs. Tgi che survegn il segund sez per l’Argovia vegn decidì en in segund scrutini.

Basilea-Citad e Basilea-Champagna: Anita Fetz e Claude Janiak cun reelecziun briglianta

La cussegliera dals chantuns da la PS, Anita Fetz ha dumagnà senza problems sia reelecziun, quai cun 35’842 vuschs. Il pli absolut era tar 25’441 vuschs. Er en il chantun Basilea-Champagna ha Claude Janiak (PS) distanzià ils adversaris burgais e dumagnà suveran la reelecziun en l’emprim scrutini. El ha fatg 42’450 vuschs tar in pli absolut da 40’559 vuschs.

Berna dovra in segund scrutini

En il chantun Berna n’ha nagin dals 11 candidats cuntanschì il pli absolut da 152’860 vuschs. Las pli bleras vuschs ha il candidat vertent, Werner Luginbühl (PBD) cun 151’069 vuschs, il segund bler ha Hans Stöckli (PS, vertent) cun 144’805 vuschs. Sin plaz trais suonda Albert Rösti (PPS) cun 136’055 vuschs. Ils ulteriurs candidats han tuts pli pauc che 75’000 vuschs.

Friburg dovra in segund scrutini

En il chantun Friburg sto il president da partida da la PS, Christian Levrat ir en il segund scrutini. El ha bain fatg las bleras vuschs (39’014), ha dentant cleramain manchentà il pli absolut da 44’842. Sco segund suonda il candidat da la PCD, Beat Vonlanthen, che duai defender il sez dad Urs Schwaller.

Glaruna – Werner Hösli e Thomas Hefti reelegids

En il chantun Glaruna èn ils cussegliers chantunals vertents vegnids reelegids. Thomas Hefti (PLD) ha fatg 8’619 vuschs, Werner Hösli (PPS) vegn sin 5’469 vuschs. Il pli absolut era tar 4’827 vuschs.

Giura: ils actuals èn reelegids

En il chantun Giura ha il politicher da la PCD, Pierre Kohler, fatg naufragi cun attatgar il sez da sia collega da partida Anne Seydoux. Lezza è vegnida reelegida ensemen cun ses collega fin ussa Claude Hèche da la PS.

Lucerna dovra in segund scrutini

Il chantun Lucerna n’ha anc betg elegì il cussegl dals chantuns. Il cusseglier vertent Konrad Graber (PCD) ed il cusseglier guvernativ Damian Müller (PLD), che duai defender il sez da la PLD da Georges Theiler che sa retira, han survegnì ils megliers resultats, n’han dentant betg cuntanschì il pli absolut. Graber ha fatg 64’577 vuschs ed è uschia be stgars sut il pli absolut da 66’278 vuschs. Damian Müller ha fatg 54’992 vuschs. Il segund scrutini è ils 15 da november.

Neuchâtel: Elegì ils actuals

En il chantun Neuchâtel ha il suveran reelegì ils cussegliers actuals Didier Berberat (PS) e Raphaël Comte (PLD).

Schaffusa: Minder e Germann reelegids

Il cusseglier dals chantuns senza partida, Thomas Minder è vegnì reelegì en l’emprim scrutini. El ha survegnì 13’733 vuschs. Il segund cusseglier dals chantuns, Hannes Germann (PPS) è era vegnì reelegì sco spetgà. El ha survegnì 20’747 vuschs. La participaziun a la votaziun era tar 68 %, il pli absolut era 13’195 vuschs, uschia ch’i na dovra betg in segund scrutini.

Soloturn: Pirmin Bischof elegì, 2. scrutini per 2. sez

En il chantun Soloturn vegni surprendentamain er ad in segund scrutini. Be il candidat da la PCD, Pirmin Bischof ha dumagnà l’elecziun cun 50'674 vuschs. L’auter cusseglier vertent, il candidat da la PS, Roberto Zanetti (42'421 vuschs) sto ir en la segunda runda. El giascha dentant cleramain avant Walter Wobmann (PPS) ch'ha fatg 29'666 vuschs e Marianne Meister (PLD) che vegn sin 25'563 vuschs. Il pli absolut era tar 44'007 vuschs.

Son Gagl – Karin Keller-Sutter reelegida, 2. scrutini per 2. sez

La cussegliera dals chantuns da Son Gagl da fin qua, Karin Keller-Sutter (PLD) è vegnida reelegida cleramain cun 76'367 vuschs. Il cusseglier vertent da la PS, Paul Rechsteiner (62'944) ed il concurrent da la PPS, Thomas Müller (50'629) n’han betg cuntanschì il pli absolut da 76'367 vuschs e ston ir en il segund scrutini.

Sursilvania: Nagin n'ha cuntanschì il pli absolut

En il chantun Sursilvania n'ha nagin dals trais candidats cuntanschì il pli absolut. Erich Ettlin (PCD) ha fatg 6'754 vuschs, André Windlin (PLD) ha fatg 4'306 vuschs ed Adrian Halter (PPS) è vegnì sin 4'023 vuschs. Il pli absolut era tar 7'542 vuschs. Il segund scrutini è ils 15 da november.

Sutsilvania: PLD piglia davent sez da la PCD

En il chantun Sutsilvania ha la PCD pers ses sez en il cussegl dals chantuns. Sco successur da Paul Niederberger (PCD) che sa retira è vegnì elegì il cusseglier guvernativ Hans Wicki da la PLD.

Wicki ha fatg 9’249 vuschs tar in pli absolut dad 8’911. Per l’emprima giada n’è la PCD betg pli represchentada en il parlament giu Berna.

Sviz: Omadus cussegliers da la PPS èn vegnids reelegids

Omadus cussegliers dals chantuns vertents da la PPS èn vegnids reelegids cleramain. Alex Kuprecht ha fatg 30'868 vuschs, Peter Föhn è vegnì sin 29’595 vuschs. Il pli absolut era tar 25’964 vuschs.

Tessin: Lombardi n'è anc betg elegì

En il chantun Tessin è il cristiandemocrat Filippo Lombardi anc betg tras. El ha survegnì 43'897 vuschs. Il segund bler vuschs ha survegnì Fabio Abate da la PLD cun 40'504 vuschs.

Turgovia: Cussegliers vertents èn reelegids

En il chantun Turgovia n’ha Clemenz Somm (PVL) gì nagina schanza cunter ils candidats vertents. El è vegnì sin 26’304 vuschs. Elegids èn pia ils cussegliers vertents Brigitte Häberli-Koller (PCD) cun 53’135 vuschs e Roland Eberle (PPS) cun 49’518. Il pli absolut era tar 34’062 vuschs.

Turitg: PS conquista puspè in sez cun Daniel Jositsch

Suenter 32 onns conquista la PS en il chantun Turitg puspè in sez en il Cussegl dals chantuns. Il cusseglier naziunal Daniel Jositsch ha dumagnà il sigl en la chombra pitschna sco unic candidat. El ha fatg 182’776 vuschs tar in pli absolut da 177’770 vuschs. A tgi ch’il segund sez va, vegn decidì ils 22 da november. Las bleras vuschs suenter Jositsch han fatg Ruedi Noser (PLD) e Hans-Ueli Vogt (PPS).

Uri: PLD surpiglia sez da la PVL en Cussegl dals chantuns

Il chantun Uri vegn represchentà en il Cussegl dals chantuns d’in duo burgais. Josef Dittli (PLD) gudogna in sez sin custs dals Verd-liberals. El ha fatg 10'979 vuschs. L’auter sez defenda il cusseglier dals chantuns da fin uss da la PCD, Isidor Baumann cun 10'782 vuschs. La participaziun a la votaziun era tar 55,3 %. Josef Dittli surpiglia il sez da Markus Stadler (PVL) che n’ha betg pli candidà.

Vallais dovra segund scrutini

En il chantun Vallais n’ha nagin dals en tut 7 candidats cuntanschì il pli absolut da 61’094 vuschs. Il meglier resultat ha fatg il cusseglier dals chantuns da fin qua, Jean-René Fournier (PCD) cun 45’690 vuschs. El vegn suandà da Beat Rieder (PCD) cun 37’100 vuschs. Ils ulteriurs candidats èn Franz Ruppen (PPS), Pierre-Alain Grichting (PLD), Thomas Burgener (PS), Christophe Clivaz (PES) e Robert Métrailler (PCD). Sche la PCD vegn da conquistar ils dus sezs en la chombra pitschna, vegn a sa mussar il 1. da november en il segund scrutini.

Zug: Peter Hegglin e Joachim Eder elegids

En il chantun Zug ha la PCD pudì defender il sez da Peter Bieri che sa retira. Il directur da finanzas Peter Hegglin è vegnì elegì en l’emprim scrutini cun 24’132 vuschs. Il vertent, Joachim Eder (PLD) è vegnì reelegì senza problems cun 23’620 vuschs. Il pli absolut era tar 18’191 vuschs.

RR novitads 7:00

Artitgels legids il pli savens