Ils manaschis da pendicularas en l'Austria, la Germania e la Svizra vulan prender a mauns a moda persistenta l’avegnir. Quai è il facit da la dieta communabla dals responsabels per las pendicularas dals trais pajais ad Innsbruck en l’Austria, sco che las trais associaziuns han communitgà. Gist en la situaziun precara cun la guerra en l’Ucraina, la mancanza d’energia e la chareschia stoppian las pendicularas gidar a segirar il bainstar en las regiuns turisticas.
Svizra
Il cusseglier dals chantuns e president da Pendicularas Svizra, Hans Wicki, ha numnà ils manaschis da pendicularas sco motors da l’economia. In franc svieuta d’ina pendiculara munta a sis francs svieuta per la destinaziun. Perquai stoppian las interpresas avair la libertad d’agir per pussibilitar la ballantscha tranter la protecziun da la natira e da la patria sco er la rentabilitad.
Austria
Las pendicularas austriacas èn s'occupadas cun la persistenza en in process da strategia. Cun spargnar energia èn ellas vi d'evaluar potenzials, sco quai ch’il spezialist da la federaziun Franz Hörl ha ditg. Las interpresas han gia pudì reducir lur consum d'energia. Ultra da quai retiran ellas bunamain 100% da l’electricitad da funtaunas persistentas.
Germania
Matthias Stauch, il president da la federaziun da las pendicularas tudestgas, vesa la rolla da las pendicularas surtut er en lur contribuziun per in mund da lavur e da temp liber cun valur vitala ed inclusiva. Quai impedeschia la depopulaziun da regiuns perifericas e da pendular.
