La bilantscha da la mesa stagiun è legraivla, tenor il monitoring da las pendicularas Svizra. La fin da schaner èn 17,8% dapli giasts stads sin las pistas, quai cumpareglià cun la media da tschintg onns. Grazia a la naiv ch'i ha dà las ultimas duas emnas, hajan las pendicularas er bunas cundiziuns.
Tuttas regiuns nodan in plus
Tuttas regiuns che fan part al monitoring han pudì augmentar la cifra da giasts. Er il Grischun po sa legrar d'in plus da 24,2% cumpareglià cun la media da tschintg onns.
Dumber da giasts
| Regiun | Midada cumpareglià cun media da 5 onns |
| Grischun | 24,2% |
| Tessin | 163,4% |
| Alps vadaisas e friburgaisas | 34,0% |
| Svizra Orientala | 22,2% |
| Part Sura Bernaisa | 21,0% |
| Svizra centrala | 18,8% |
| Vallais | 7,7% |
| Svizra | 17,8% |
Il pli grond plus ha bain fatg il Tessin, cun +163,4%. Raschun è dentant ch'il Tessin ha gì ils onns dal 2014/15, ils 2015/16 e 2016/17 trais onns cun pauca naiv. Quai influenzescha la media da tschintg onns. Pertge perquai ch'i han gì quest onn dapli naiv han els era gì dapli giasts sin pista.
I dat dentant er perdents: En las regiuns fitg bassas, n'han territoris da skis fitg pitschens anc betg pudì cumenzar la stagiun, perquai ch'els n'han nagina naiv. Malgrà che quels territoris èn disads grondas variaziuns da stagiun tar stagiun, è in enviern sco quest per els ina fitg gronda sfida finanziala.
Ord l'archiv:
RTR novitads 14:00
