Sche la BKW na pudess betg producir energia, stuess ella pajar indemnisaziuns als clients, e quai tar ils pretschs actuals dal martgà. Cun quai che quels èn il mument fitg auts, è la BKW sa preparada: ella po en cas da problems en la producziun prender si 2 milliardas francs credits. Quai ha la BKW annunzià glindesdi.
Cun quai n'è la BKW betg dependenta d'agid da la Confederaziun sco l'Axpo. Quella vegn en il cas da problems en la producziun sustegnida cun credits da 4 milliardas francs da la Confederaziun. La BKW survegniss quels credits da differentas bancas en furma d'in uschenumnà credit da sindicat.
En princip profiteschan ils producents d'energia dals auts pretschs d'energia, chaschunads da la guerra en l'Ucraina. Dentant creschan er ils ristgs en il martgà d'energia.