La Svizra stat avant decisiuns da princip en la politica dal clima. Entant che las leschas existentas prevesan gia mesiras e meds finanzials per la protecziun dal clima, vegn votà davart in arranschament che va cleramain pli lunsch. Inoltrà l'iniziativa han la Partida socialdemocratica ed ils Verds.
Actualmain pretenda la Lescha davart il clima e l'innovaziun che la Svizra reducescha sias emissiuns da gas cun effect da serra fin l'onn 2050 a netto nulla e contribueschas sia part a la Cunvegna da Paris davart il clima. Per quest intent metta la Confederaziun a disposiziun var 2 milliardas francs per onn, per exempel per implants solars u per remplazzar stgaudaments d'ieli tras pumpas da chalur.
Tge vul l'iniziativa?
L'iniziativa per il fond per il clima pretenda meds finanzials cleramain pli auts: La Confederaziun duai crear in fond e pajar annualmain 0,5 fin 1% da la prestaziun economica (product interiur brut). Quai munta a var 4 fin 8 milliardas francs. Uschia duain vegnir promovidas
- la reducziun da las emissiuns da gas cun effect da serra
- l'effizienza energetica ed il consum spargnus
- la segirezza dal provediment e dapli energia regenerabla
- la biodiversitad
La finanziaziun e la realisaziun duain esser socialmain gistas. La Confederaziun ha dus onns temp da drizzar en il fond, a partir dal terz onn suenter il Gea a l'urna duai vegnir pajà en il fond.
Tge din ils adversaris?
Per ils adversaris fa la Svizra gia bler per il clima. La Confederaziun ha gìa uss a disposiziun passa 2 milliardas francs per mesiras per proteger il clima e per transfurmar il sistem d'energia.
Il fond purtass bain dapli daners, dentant era dapli debits. Il fond è numnadamain betg suttamess al frain da l'indebitament – vul dir che la Confederaziun dastgass prender si novs debits per emplenir il fond. Per las adversarias betg ina buna idea en la situaziun finanziala tendida da la Confederaziun.
Plinavant dettia il privel ch'ils daners vegnian duvrads per projects che na portian pauc u che fissan uschè u uschia vegnids finanziads – simplamain da privats.
Il Cussegl federal ed il parlament refuseschan l'iniziativa.
