I va per il quint da Serafe, pia la taxa da medias che mintga chasada ed intginas fatschentas han da pajar. Actualmain han las chasadas da pajar 335 francs per onn. Ed era fatschentas ch'han ina svieuta da 500’000 francs u dapli pajan la taxa da medias. Cun questa vegn finanzià ina gronda part dal service-public da la SRG SSR – tar questa tutga era RTR. Era televisiuns e radios privats cun ina concessiun survegnan daners or da la cassa da la taxa.
Tge pretenda l’iniziativa?
L’iniziativa SRG SSR che vegn da la Partida populara Svizra pretenda che la taxa da medias vegn reducida da 335 sin 200 francs e che fatschentas na ston betg pli pajar la taxa. L’iniziativa vul diminuir la SRG SSR e reducir la purschida.
La iniziativa vul che la SRG SSR sa focusescha sin la basa d'infurmaziun. L'interpresa duai far pli pauc online, avair pli paucs chanals da social media e reducir la producziun da sport e divertiment.
Cun reducir la prestaziun publicistica da la SRG SSR vul l’iniziativa promover la libertad da radios e televisiuns privats che survegnan era daners da la taxa da medias – quels n'èn dentant betg pertutgads da l’iniziativa da la PPS.
Tge din ils adversaris?
Per il Cussegl federal va l’iniziativa memia lunsch. El vesa dentant era basegn d’agir tar la SRG SSR ed ha pervia da quai gia decis in project che duai distgargiar chasadas e fatschentas. Tenor il minister da medias Albert Rösti è quest project equilibrà.
Il Cussegl federal ha decis da reducir la taxa per las chasadas en in emprim pass a partir da l’onn 2027 da 335 sin 312 francs. En in segund pass a partir dal 2029 lura sin 300 francs per onn. Plinavant ston mo pli interpresas cun ina svieuta da passa 1,2 milliuns francs pajar la taxa da Serafe. Quai pertutga lura be pli radund 20% da las interpresas en Svizra.
Il Cussegl federal ed era il parlament recumondan da refusar quest’iniziativa.
