Votaziuns 8 da mars 2026 - Iniziativa SRG SSR va memia lunsch per il Cussegl federal

I va per il quint da Serafe, pia la taxa da medias che mintga chasada ed intginas fatschentas han da pajar. Actualmain han las chasadas da pajar 335 francs per onn. Ed era fatschentas che han ina svieuta da 500’000 francs u dapli pajan la taxa da medias. Cun questa vegn finanzià ina gronda part dal service-public da la SRG SSR – tar questa tutga era RTR. Era televisiuns e radios privats cun ina concessiun survegnan daners ord la cassa da la taxa.

Tge pretenda l’iniziativa?

L’iniziativa SRG SSR, che vegn era numnada iniziativa «200 francs bastan!» che vegn da la Partida populara Svizra pretenda che la taxa da medias vegn reducida da 335 sin 200 franc e che nagina fatschenta sto pli pajar la taxa. L’iniziativa vul diminuir la SRG SSR e reducir la purschida.

Cun reducir la prestaziun publicistica da la SRG SSR vul l’iniziativa promover la libertad da radios e televisiuns privats – quests èn numnadamain betg tutgads da l’iniziativa da la PPS.

La posiziun dal Cussegl federal

Per il Cussegl federal va l’iniziativa memia lunsch. El vesa dentant era basegn d’agir tar la SSR ed ha pervia da quai schon decidì in project che duai distgargiar chasadas e fatschentas. Tenor il minister da medias Albert Rösti è quest project equilibrà. Il Cussegl federal ha decidì da reducir la taxa per las chasadas en in emprim pass a partir da l’onn 2027 da 335 sin 312 francs. En in segund pass a partir dal 2029 lura sin 300 francs per onn.

Tar las fatschentas duessan mo pli pajar questas cun ina svieuta sur 1,2 milliuns francs la taxa da medias. Tenor il Cussegl federal n'avessan 80% da las fatschentas ch'han enfin uss pajà la taxa, betg pli da pajar questa.

Tenor il Cussegl federal duess la SSR spargnar e porscher in program reducì – dentant tuttina in da buna qualitad e da tut las regiuns. Sche l’iniziativa vegniss acceptada indebliss quai memia ferm la SSR, gist era las regiuns, da quai è Albert Rösti persvadì.