Las opiniuns eran fatgas en il Cussegl dals chantuns. Suenter il Cussegl naziunal na vul era il Cussegl dals chantuns savair nagut da reducir la taxa da radio e televisiun. Quai gist sco quai ch'il Cussegl federal e la cumissiun per traffic e telecommunicaziun dal Cussegl dals chantuns avevan proponì. E cunquai che nagin commember e nagina commembra dal Cussegl dals chantuns n'ha fatg in'autra proposta – per exempel da recumandar l'iniziativa u far ina cuntraproposta – è questa vegnida refusada era senza ina votaziun formala en la chombra pitschna. Il Cussegl naziunal aveva refusà l'iniziativa gia en la sessiun da stad, uschia che questa po ir en la votaziun finala.
Reducir la taxa da 335 sin 200 francs ad onn
L'iniziativa vul reducir la taxa da radio e televisiun dad oz 335 sin 200 francs ad onn. Ultra da quai duain interpresar vegnir deliberadas da la taxa. Il Cussegl federal era gia vegnì encunter als iniziants l'onn passà cun la decisiun da reducir la taxa da 335 sin 300 francs ad onn.
Rösti avertescha d'ina centralisaziun da la SRG SSR
In dals arguments dal Cussegl federal saja era la centralisaziun inevitabla da la SRG SSR, sche l'iniziativa vegniss approvada ed ils daners reducids uschè massiv. La consequenza fiss ch'i dessia anc maximalmain 2 centers principals da la SRG SSR en Svizra, ha ditg il cusseglier federal Albert Rösti. Ussa dettia quai anc 7 structuras grondas e 17 pli pitschnas organisadas da moda decenterala.