L'iniziativa «200 francs bastan» vul reducir la taxa per radio e televisiun dad actualmain 335 francs sin 200 francs. Lantschà ella il mars 2022 avevan commembers da la Partida populara svizra, da l'Uniun svizra d'artisanadi e mastergn sco er dals Giuvens liberals. Quai quatter onns suenter il cler na da passa 71% a l'iniziativa «No Billag» il 2018.
Il 2023 ha la chanzlia federala declerà l'iniziativa valaivla cun 126'000 suttascripziuns, uschia ch'igl è stà cler che la populaziun svizra ha da decider in'ulteriura giada davart la taxa da radio e televisiun.
Delegaziun grischuna malperina
Gia durant la debatta en il parlament è Roman Hug (PPS) sa mussà sco aderent da l'iniziativa. «Er jau sco represchentant d'in chantun triling poss star bain davos questa iniziativa, perquai che cun acceptar ella, poi finalmain puspè vegnir debattà seriusamain en quest parlament davart l'incumbensa da basa da la SSR», uschia Hug.
Tut auter vesan quai Martin Candinas (Il Center) e Jon Pult (PS). Els averteschan da las consequenzas da l'iniziativa che pertutgass en spezial era Radiotelevisiun Svizra Rumantscha RTR. «Sche l'iniziativa vegniss acceptada, signifitgass quai er che la mesadad da las plazzas da lavur giessan a perder en il Grischun», uschia Pult en l'emissiun Controvers.
Cussegl federal refusa iniziativa – decida sez ina reducziun pli modesta
Il Cussegl federal ha entant piglià posiziun il november 2023. Tenor il cusseglier federal responsabel per las medias Albert Rösti avess l'iniziativa in grond effect sin la purschida publicistica e las ragischs regiunalas da la SRG SSR. Il Cussegl federal refusa l'iniziativa e na fa nagina cuntraproposta. Il Cussegl federal ha però decidì da reducir la taxa sin 300 francs a partir dal 2029. Ultra da quai vul el auzar la limita per las interpresas che ston era pajar la taxa – d'ina svieuta da 500'000 francs actualmain – sin pir a partir d'ina svieuta da 1,2 milliuns francs.
Cussegl naziunal refusa l'iniziativa
Il Cussegl naziunal na vul savair nagut da sbassar las taxas da radio e televisiun da 335 sin 200 francs. La Chombra gronda ha refusà l'iniziativa federala dal pievel «200 francs bastan!» cun 116 Gea e 74 vuschs Na tar duas abstenziuns.
Tant las partidas da la sanestra sco il Center averteschan d'ina reducziun massiva da qualitad tar radio e televisiun. Questa na stettia en nagina relaziun cun il levgiament per las chasadas. La Partida populara Svizra pretenda dapli effizienza tar la SRG SSR e las medemas cundiziuns per medias privatas. Per la Partida verd-liberala e la Partida liberaldemocrata è l'iniziativa memia radicala.
La discussiun en il parlament è stada lunga, 76 cusseglieras e cussegliers naziunals eran s'annunziads per tegnair in pled.
