Ina tschuncantina da commembras e commembers s’han chattads en las localitads da la sala polivalenta en vischinanza da la baselgia a Sent. Sper la preschentaziun da la vischnanca entras il capo Aita Zanetti ed ils pleds ord vista chantunala dal cusseglier guvernativ Jon Domenic Parolini ha l'anteriur directur general da la SRG SSR Roger de Weck sensibilisà ils preschents per l’impurtanza e la funcziun da las medias en Svizra. Plinavant ha il directur da RTR Nicolas Pernet preschentà la vastezza e la lavur mediala da la chasa RTR.
36'000 francs per la campagna
Il president da la SRG.R Vincent Augustin ha fatg attent a l’impurtanza d’avair contact cun la basa, cun la populaziun, cun ils commembers e las commembras da la SRG.R, per cumbatter ensemen l'iniziativa «200 francs bastan» che vul quasi smesar las taxas da medias.
Nus prevesain dad organisar, cun uschenumnads stakeholders sco chors e musicas, cun la scena litterara e da chant acziuns per cumbatter l’iniziativa.
Il president da la SRG.R Vincent Augustin è persvadì che l’iniziativa fa naufragi, ma per entant spetga la SRG.R blera lavur da persvasiun. L’iniziativa vegn ad ir en votaziun previsiblamain durant l’onn 2026.