Maridà u betg maridà – entras la lescha federala davart l'imposiziun da taglia individuala duessan tuttas persunas en Svizra far ina atgna decleraziun da taglia. Oz fan pèrs maridads ensemen ina. Quai maina però ad inegualitads, ha la cussegliera federala Karin Keller-Sutter declerà avant las medias.
Pèrs cun cundiziuns economicas cumparegliablas ston oz savens pajar taglias da differenta autezza – e quai be perquai ch'els èn maridads u betg maridads.
Il Cussegl federal ed il parlament recumonda d'approvar la lescha. En il fratemp crititgeschan adversaris ed adversarias trais puncts. D'ina vart vegn ditg che la discriminaziun da pèrs maridads saja era pussaivla da curreger senza ina midada da sistem uschè radicala.
Quai saja correct, di la Cussegliera federala, ma ils ultims 40 onns hajan tuttas emprovas fatg naufragi. Ed ils avantatgs da l'imposiziun da taglia individuala saja ch'ella n'aboleschia betg be la discriminaziun da pèrs maridads, mabain en return er il bonus da lètg. E ch'ella elimineschia ils impuls negativs da l'imposiziun da taglia cuminaivla.
Plinavant vegn crititgà che pèrs maridads cun be ina entrada vegnian chargiads pli fitg. Era quai saja uschia. Il motiv saja ch'ils pèrs pertutgads perdian en l'avegnir il bonus da lètg, pia in privilegi ch'els han oz envers pèrs nunmaridads cun era be in'entrada. I dettia però in element da cumpensaziun: l'augment marcant da la deducziun per uffants che procura che la chargia supplementara da famiglias cun be in'entrada vegn reducida tar la taglia federala directa.
Ed era la critica da dapli birocrazia pervia da las stimadas 1,7 milliun decleraziuns da taglia supplementaras tras la midada renviescha Karin Keller-Sutter. Ord vista dal Cussegl federal na possia quai betg esser in motiv da desister d'in levgiament per pajataglias.
La lescha che va en votaziun ils 8 da mars da quest onn, giess pli probabel en vigur l'onn 2032.