Siglir tar il cuntegn

Header

audio
Iniziativa per l'egualitad da taglia
Or da Actualitad dals 21.02.2024. Maletg: pixabay
laschar ir. Durada: 4 minutas 35 Secundas.
cuntegn

Taglia individuala Cussegl federal vul mitigiar la discriminaziun da pèrs maridads

Il parlament po decider davart abolir la discriminaziun da pèrs maridads sch'i va per la taglia. Il Cussegl federal ha approvà oz il messadi per introducir l'imposiziun da taglia individuala. El preferescha sco gia annunzià la via sur ina lescha e refusa in nov artitgel da constituziun. Il Cussegl federal cusseglia perquai da refusar l'iniziativa da la PLD per ina imposiziun da taglia independenta al stadi civil e dad enstagl acceptar la cuntraproposta. Cun la nova lescha federala possia la medema finamira vegnir cuntanschida pli spert. Sche quella giess en vigur quinta il Cussegl federal cun radund ina milliarda entradas da taglia damain per onn.

Pèrs maridads duain uschia en l’avegnir vegnir taxads sco pèrs nunmaridads ed emplenir duas decleranzas da taglia separadas.

Pli autas deducziuns per uffants

Las datas fundamentalas aveva il Cussegl federal gia decis l’avust 2023 sin basa dals resultats da la consultaziun. Tar la maioritad da las partidas è il project dentant crudà tras. La midada radicala dal sistem tar la taxaziun da pèrs maridads stgaffeschia novas malgistadads, è stà il tenor.

Tuttina ha il Cussegl federal anticipà il project ch’il parlament aveva pretendì en il rom da la planisaziun da la legislatura. La midada da la taxaziun individuala duai tenor ses avis dar impuls da lavur positivs, garantir ina taxaziun independenta dal stadi civil ed eliminar il chasti da maridaglia che vegn titulà dal Tribunal federal sco cuntrari a la constituziun.

Las entradas e la facultad da pèrs maridads vegnan uschia repartidas tenor las relaziuns dal dretg civil, sco quai ch'i vegn gia fatg oz tar pèrs betg maridads. La deducziun per uffants tar la taglia federala directa duai vegnir auzada dad oz 6’700 sin 12'000 francs. En la consultaziun eran anc vegnids proponids 9’000 francs.

I manca ina milliarda francs

Perencunter duai vegnir desistì da la deducziun per tegnairchasas cun be ina persuna creschida. Era per pèrs maridads cun be ina entrada n’è betg previs ina deducziun speziala.

L’imposiziun individuala è tenor ils plans dal Cussegl federal previsa sin tut ils plauns statals. Ils chantuns stuessan pia realisar la refurma sin plaun chantunal e communal. Avertas èn las consequenzas per las taglias chantunalas, perquai ch’ils chantuns èn libers da concepir las tariffas e las deducziuns.

Tar la taglia federala directa quinta il Cussegl federal cun circa ina milliarda francs damain entradas ad onn, quai sin l'onn fiscal 2024. Da quai surpiglia la Confederaziun circa 800 milliuns francs ed ils chantuns circa 200 milliuns francs. Pervia da la cumplexitad da la midada da sistem sto tenor il Cussegl federal vegnir fatg quint cun in orizont da realisaziun pli lung. Il project na saja perquai era betg adattà en la planisaziun da finanzas.

Tschertas persunas pudessan pajar dapli

Adattar vul il Cussegl federal la tariffa da taglia. Uschia duain las tariffas da taglia per entradas bassas e mesaunas vegnir sbassadas ed ellas duain vegnir auzadas levamain per fitg autas entradas. Las adattaziuns da las tariffas han pussibilità in effect da distgargia pli egual da la refurma davart las classas d'entradas.

Cun la midada da sistem resultan – tenor la stimaziun actuala – oravant tut levgiaments da taglia per pèrs maridads cun ina repartiziun d’entradas guliva. Quai pertutga era numerus pèrs maridads gia pensiunads. Persunas nunmaridadas senza uffants survegnan en media medemamain ina distgargia, grazia a la reducziun da la tariffa da taglia.

Per pèrs maridads cun be in’entrada u cun ina segunda entrada bassa porta la refurma perencunter tschertas grevezzas supplementaras tar la taglia directa da la confederaziun. Quai pertutga oravant tut pèrs maridads cun be in’entrada ed uffants.

Clera maioritad profitass

Tar persunas nunmaridadas cun uffants chaschuna la crudada da la tariffa da taglia privilegiada actuala en la part suprema da 10 classas d'entradas tenor la stimaziun actuala tschertas grevezzas supplementaras. Quai entant che la reducziun da las tariffas da taglia e l'augment da la deducziun per uffants dastgassan cumpensar quest effect tar las classas d'entrada bassas e mesaunas.

«Tenor las stimaziuns vegn la chargia fiscala a sa reducir cun la cuntraproposta indirecta per ina clera maioritad da las pajataglias e dals pajataglias», ha scrit il Cussegl federal.

audio
Per taldar: las novitads da las 14:00
ord RTR Audio dals 21.02.2024.
laschar ir. Durada: 2 minutas 48 Secundas.

RTR novitads 14:00;

Artitgels legids il pli savens