Actualmain fan pèrs maridads ina decleranza da taglia communabla. Quai maina ad inegualitads cun pèrins betg maridads, nua ch'omadus partenaris fan in'atgna decleranza da taglia. Per midar quai duain tut las persunas en Svizra vegnir taxadas individualmain, independent dal stadi civil. Ord quai motiv ha il parlament deliberà la Lescha federala davart l'imposiziun da taglia individuala. La lescha è la cuntraproposta a l'iniziativa per ina taglia individuala da las dunnas da la Partida liberaldemocratica. Lezzas avevan retratg l'iniziativa suenter ch'il parlament aveva elavurà la lescha.
Encunter la lescha hai dà in referendum – perquai datti ina votaziun dal pievel en chaussa.
Tge mida cun la nova lescha?
Cun la midada paja mintga persuna en Svizra taglia sin sias atgnas entradas e sin sia atgna facultad – i vala per tuts e tuttas la medema tariffa da taglia. Per blers pèrs maridads dat quai in levgiament da taglia – la Confederaziun quinta che 50% dals pèrs maridads pajan pli pauca taglia. Per 36% duai sa midar nagut e 14% pajan dapli taglia. Quai oravant tut ils pèrs nua che be ina persuna gudagna – u be ina persuna gudagna la gronda part da las entradas.
Ina ulteriura midada è che las deducziuns per uffants vegnan auzadas. Dad actualmain 6'800 francs per uffant sin 12'000 francs.
Plinavant pussibiliteschia la taglia individuala d'auzar il pensum da lavur a persunas maridadas – che na faschevan fin uss betg quai perquai ch'i chaschunava be dapli taglia.
Tge din ils adversaris?
Il comité dal referendum argumentescha ch'i na dettia betg dapli egualitad mabain nova inegualitad. Pèrs cun autas pajas profiteschian numnadamain da la midada da taglia, pèrs cun pajas bassas perdessan. Plinavant dettian las 1,7 milliuns dapli decleranzas da taglia mintg'onn ina gronda lavur supplementara per l'administraziun e chaschunian cun quai era custs.
L'inegualitad tranter pèrs maridads e betg maridads avess'ins era pudì schliar senza ina midada cumpletta dal sistem da taglia, argumenteschan ils adversaris.
Il Cussegl federal ed era il parlament recumondan d'approvar la Lescha federala davart l'imposiziun da taglia individuala.
