La finamira da l’iniziativa
Las iniziantas ed iniziants pretendan dapli meds per la politica dal clima. L’iniziativa vegn da la Juso, ils Giuvens socialists. Ils daners supplementars duessan vegnir da la taglia federala d’ierta e donaziuns. Per in’approvaziun è necessaria la maioritad dal pievel ed era la maioritad dals chantuns.
Quai è nov
Enfin uss enconuschan mo chantuns e vischnancas la taglia d’ierta. Nov duess era la Confederaziun pretender ina taglia da 50%. Las emprimas 50 milliuns na duessan dentant betg vegnir suttamessas a la taglia. Dus terz da questas entradas duess survegnir la Confederaziun, in terz ils chantuns. Questas entradas da la taglia d’ierta e donaziuns duessan tenor l’iniziativa vegnir duvradas per il cumbat da la crisa da clima e per la reconstrucziun da l’economia cumplessiva che fiss necessaria. L’iniziativa pretenda era mesiras che impedeschan che persunas eviteschan la taglia, per exempel cun partir da la Svizra en in auter pajais.
In exempel
Ina persuna ha ina facultad da 200 milliuns francs. Quest possess po esser daners, immobiglias, aczias ed uschia enavant. La persuna regala 30 milliuns francs. Suenter che questa persuna è morta resta ina ierta da 170 milliuns francs.
Da quests 200 milliuns francs ch’èn vegnids ertads u regalads fissan tenor l’iniziativa 50 milliuns libers da taglia. Sin il rest da 150 milliuns francs sto vegnir pajà ina taglia da 50%. Quai vul dir ch’ils ertavels pajan 75 milliuns francs a la Confederaziun. Quest retgav va per dus terz a la Confederaziun ed in terz als chantuns.
Tgi fiss pertutgà?
Tenor ina stimaziun da l’administraziun federala da taglia possedan 2’500 persunas ch’èn suttamessas a la taglia en Svizra ina facultad da passa 50 milliuns francs. Quant grond ch’il retgav da questa nova taglia fiss, dependa fermamain dal cumportament da las persunas pertutgadas. Persunas bainstantas pudessan bandunar la Svizra u gnanc vegnir a star en Svizra.
Il Cussegl federal ed era il parlament recumondan da refusar quest’iniziativa. Per els saja quai la faussa via per cuntanscher la finamira da clima. E l’implementaziun da l’iniziativa pudess chaschunar che persunas bainstantas e fatschentas bandunan la Svizra. Quai periclitass plazzas da lavur ed empè d’augmentar las entradas da taglia pudess quai manar tar pli paucas.